Por Chantada celebrou unha asemblea e traballa xa nunha candidatura plural para conseguir a maioría que traia a mudanza que o Concello precisa.

Chantada, 23 de maio de 2022.

  • Aprobouse un Plano estratéxico para conseguir a maioría que traia a mudanza que a viciñanza nos demanda o vindeiro mes de maio de 2023 e sen temor de confrontar o PP e as marcas brancas que xa está impulsando para tentar perpetuarse no poder.

  • Trabállase nunha candidatura plural de veciñas e veciños, atendendo ás nosas 36 parroquias e os diferentes sectores do noso territorio, co gallo de conformarmos unha candidatura gañadora e con capacidade de xestión e transformación.

  • A candidatura viciñal acordou impulsar a II Romaría Galeguista o vindeiro 16 de xullo.

 

IMG-20220521-WA0001
Antom Fente, voceiro de Por Chantada, nun momento da asemblea do pasado 21 de maio. Foto: Por Chantada.

O pasado 21 de maio, no Círculo Recreativo Cultural de 10:30 até as 13:30 horas, celebrouse unha asemblea de Por Chantada na que se expuxeron e explicaron as contas da candidatura viciñal en 2021. A nosa formación sempre apostou pola transparencia e a rendición de contas ao tempo que enceta o período de cobranza das cotas de 2022 após a paréntese que supuxo a irrupción da Covid-19.

De igual xeito, acordouse adaptar e actualizar o Plano estratéxico para conseguir a maioría que traia a mudanza que a viciñanza nos demanda o vindeiro mes de maio de 2023. Somos conscientes de que, a pesar de que desenvolvemos un labor intenso nestes últimos catro anos e que soubemos facer unha oposición construtiva tamén no pior da pandemía, debemos aínda convencer a moitas viciñas e viciños que senten a mesma paixón e ilusión ca nós á hora de mellorar Chantada.

A sociedade local foi abalada por múltiplas crises e calquera pode enxergar un panorama con máis sombras ca luces para os vindeiros anos que exixe que xente formada, con ideas novas e con capacidade de traballo e sacrificio tome as rédeas do Concello se queremos evitar ser un territorio sen proxección e futuro para as novas xeracións.

Por iso, coa vista posta en atinxirmos esa maioría que precisamos para construír futuro e benestar no noso Concello, traballamos nunha candidatura da viciñanza, plural e aberta, atendendo ás nosas 36 parroquias e os diferentes sectores do noso territorio.

Non nos van condicionar as tentativas, xa en marcha, de erguer marcas brancas coas que os de sempre pretenden perpetuarse no poder en canto Chantada esmorece e os desequilibrios aumentan. Por Chantada traballa por un Concello de todas e para todos para o que precisamos unha candidatura gañadora e con capacidade de xestión e transformación.

No aspecto máis lúdico, a asemblea tamén tivo tempo de aclarar o formato da II Romaría Galeguista, que terá lugar o vindeiro 16 de xullo, e que será unha encontro de carácter aberto e festivo no que haberá presenza de compañeiras e compañeiros de Interior Galego Vivo.

Por último, Por Chantada seguirá apostando por unha comunicación fluída e continua coa viciñanza, avanzar escoitando, trasladando as problemáticas das entidades sociais ao Pleno e traballar na resolución dos retos e problemáticas da sociedade local. Con humildade, entrega e constancia e sen nengunha dependencia exterior como até agora fixemos. O futuro ten partido.

 

A viciñanza interesada en receber máis información ou achegarse a nós pode facelo escrebéndonos através das nosas RRSS ou formulario de contacto desta bitácora.

 

Por Chantada proporá no vindeiro pleno medidas para protexer o mosteiro de San Salvador de Asma

A candidatura viciñal lamenta que prosiga o abandono por parte da Xunta e do Concello de Chantada a pesar de ser declarado BIC na categoría de monumento (BIC.000.705).

Por Chantada propón impulsar un plan especial de protección (PEP) do mosteiro de San Salvador de Asma como primeiro paso firme para deter o seu deterioro e demanda dirixirse á Consellaría de Cultura para que colabore nas actuacións protectoras através dun convenio de financiamento do devandito instrumento de planeamento urbanístico.

Antom Fente e Cruz Fernández defenderán no pleno que o Goberno central e a Xunta adquiran o mosteiro para darlle un uso público e garantindo o seu uso e desfrute, en tanto BIC, para a toda a cidadanía.

Mosteiro de San Salvador
O noso voceiro nas inmediación do mosteiro acompañado pola viciñanza que alertou das obras que se estaban efectuando sen licenza habilitante. Foto Por Chantada.

O mosteiro de San Salvador de Asma é un dos núcleos xustificativos da inventio da Ribeira Sacra e co románico base da candidatura da Ribeira Sacra a patrimonio da humanidade que, reiteramos, ten deixado na marxe aos habitantes do territorio ao primar a configuración dunha marca territorial sobre a protección real do patrimonio material e inmaterial, a paisaxe ou a fixación de poboación. De feito, todas as parroquias ribeirás incluídas na delimitación da candidatura perderon entre 2000-2020 40% da poboación e o envellecemento é notábel. Uns dados tan rotundos só poden definirse como demotanasia, é dicir, o baleirado dun territorio alentado –por acción ou omisión– desde as institucións.

San Salvador de Asma é central para historia da comarca. A súa orixe remóntase ao século IX e consta documentación desde 1074, cando aínda era unha abadía. Dificilmente, se pode entender que semellante fito do noso patrimonio colectivo aparecese en pleno século XXI á venda en Milanuncios sen que a declaración de BIC por parte da Xunta tivese revertido a súa continuada degradación, ruína e abandono.

obras mosteiro são salvador de asma 4
Foto tomada desde o exterior do mosteiro cando a viciñanza da parroquia de San Salvador alertou das obras que se estaban efectuando no interior do mosterior. Foto: Por Chantada.

Desde Por Chantada levamos desenvolto numerosas iniciativas perante diversas institucións na defensa do noso patrimonio e, no que atinxe ao mosteiro de San Salvador de Asma, podemos salientar iniciativas como a Moción de Por Chantada-CUP para impulsar a adquisición e xestión públicas do mosterior de San Salvador de Asma (2017), varios expedientes demandando a intermediación da Valedora do pobo (2019-2022) ou perante a Dirección Xeral de Patrimonio. No entanto, o único certo é que, e isto cómpre subliñalo, a degradación de San Salvador de Asma continúa a pesar de que, no papel, a súa protección é integral.

obras mosteiro são salvador de asma 3
Foto tomada desde o exterior do mosteiro cando a viciñanza da parroquia de San Salvador alertou das obras que se estaban efectuando no interior do mosterior. Foto: Por Chantada.

Desta arte, Por Chantada demandará o cumprimento do artigo 20.1 da Lei 16/58 do Patrimonio Histórico Español, que fixa a obriga de redactar un Plano de especial protección para os lugares declarados BIC. Tamén o disposto no Catálogo do Patrimonio Cultural da Galiza, art. 30.1 da Lei 5/2016, de 4 de maio, do patrimonio cultural da Galiza (LPCG) e no art. 35 LPCG para o grado de protección e usos permitidos.

Entre as prerrogativas do Concello de Chantada atópase a de instar á redacción dun plan especial ou mesmo outras actuacións protectoras como a prevista na lei, mesmo a situación disposta no artigo 51 da Lei 5/2016, do 4 de maio, do patrimonio cultural da Galiza no tocante á expropiación forzosa.

obras mosteiro são salvador de asma 2
Foto tomada desde o exterior do mosteiro cando a viciñanza da parroquia de San Salvador alertou das obras que se estaban efectuando no interior do mosterior. Foto: Por Chantada.

Por todo isto, Por Chantada propón, por unha banda, impulsar, como primeiro paso para a súa conservación, a redacción dun plan especial de protección (PEP) do mosteiro de San Salvador de Asma (BIC.000.705) e dirixirse á Consellaría de Cultura para que colabore nas actuacións protectoras através dun convenio de financiamento do devandito instrumento de planeamento urbanístico. Por outra banda, desde a candidatura viciñal entendemos que o Goberno central e a Xunta da Galiza deben pór os medios para adquirir o mosteiro de San Salvador de Asma dándolle un uso público e garantindo o uso e desfrute do BIC debidamente contextualizado.

obras mosteiro são salvador de asma 1
Foto tomada desde o exterior do mosteiro cando a viciñanza da parroquia de San Salvador alertou das obras que se estaban efectuando no interior do mosterior. Foto: Por Chantada.

Captura de pantalla 2019-04-21 a las 10.27.36

Por Chantada reclama políticas preventivas inmediatas fronte á seca para mitigar as restricións que se van orixinar.

 

Desde Por Chantada demandamos ao Concello de Chantada, á Confederación Hidrográfica Miño-Sil e á Xunta que comecen xa a traballar nun plan de continxencia coordinado que mitigue os efeitos da pior seca en décadas, pois de non faceren nada as restricións poden atinxir a auga potábel e comprometer seriamente a vida da viciñanza.

IMG-20220508-WA0010

 

O inverno e a primavera foron excepcionalmente pobres no tocante a precipitacións e, se o ano continúa por este camiño, no verao imos afrontar serias dificultades nas traídas viciñais. Amais, precisamos con urxencia antepor a calquera outra consideración a salvagarda da cada vez máis escasa auga potábel, xa que os nitratos e outras polucións comprometen seriamente que no país dos mil ríos haxa auga que poidamos beber sen risco para a saúde humana e animal.

O Goberno local debe comezar a facer política preventiva, por exemplo, aconsellando un uso racional da auga, dando pautas á viciñanza e predicando co exemplo, para o que cómpre vixiar que non se volvan producir vendas de augapor parte da concesionaria sen coñecemento, aparentemente, por parte do Goberno local. Neste sentido, debemos volver lamentar o uso de glifosato na vila de Chantada, aínda esta mesma semana; a crónica insuficiencia da depuradora, que non se atende desde as diferentes administracións; ou a ausencia de separativo de pluviais e fecais en amplas zonas da vila. Cando nos deamos de conta do mal que estamos tratando o medio e as reservas hídricas pode ser xa tarde demais.

Igualmente, facemos un chamado á Confederación Hidrográfica a vixiar o impacto ambiental e social dos pantaláns e embarcacións que está autorizando para o que se debería elaborar un estudo muldisciplinar.

IMG-20220508-WA0009

Unhas institucións serias deberían actuar xa, pois a seca é evidente e fai prever unha época estival moi complicada en canto a fornecemento de augas, mais tamén para os incendios polo que demandamos á Xunta un reforzo dos servizos de extinción e aumentar as dotacións para rozado mecánico e manual de xeito preventivo, así como revisar as infraestruturas de fornecemento de auga en caso de lume.

Se non actuamos agora o cenario máis plausíbel será un verao con restricións no consumo con consecuencias para a hostelaría, as piscinas municipais ou mesmo as exploracións agrogandeiras.

Captura de pantalla 2019-04-21 a las 10.27.36

Conta xeral 2021

Captura de pantalla 2019-04-21 a las 10.27.36

DECRETO 2022-0320 [CONVOCATORIA COMISIÓN ESPECIAL DE CONTAS 2021]

ACTA DE ARQUEO 31_12_2021

CERTIFICACIONS BANCARIAS SALDO 31_12_2021

ANEXO I.- BALANCE DE SITUACION

ANEXO II.- CONTA DO RESULTADO ECONÓMICO-PATRIMONIAL

ANEXO III.-ESTADO DE CAMBIOS NO PATRIMONIO NETO

ANEXO IV.- ESTADO DE FLUXOS DE EFECTIVO

ANEXO IX.- VALORES RECIBIDOS EN DEPOSITO

ANEXO V .-ESTADO LIQUIDACION DE INGRESOS 2021

ANEXO V.- ESTADO LIQUIDACION GASTOS 2021

ANEXO VI.- RESULTADO ORZAMENTARIO 2021

ANEXO VII- MEMORIA CONTA 2021

ANEXO VIII.-PRESENTACIÓN POR ACTIVIDADES DA CONTA DO RESULTADO ECONOMICO-PATROMINIAL

ANEXO X.-INDICADORES FINANCEIROS- PATRIMONIAIS

ANEXO XI.- INDICADORES ORZAMENTARIOS

BALANCE DE COMPROBACION

INFORMES DE INTERVENCION 2022-0011

INFORME CONTA XERAL 2021

eaf71767-95cf-47ea-9e50-ad23493047a8

Moción de Por Chantada para adoptar unha declaración institucional sobre o Sahara Occidental.

Captura de pantalla 2019-04-21 a las 10.27.36

As declaracións institucionais requiren a UNANIMIDADE de todos os grupos para saíren avante. A pesar desa dificuldade, o Fondo Galego de Cooperación e Solidariedade e a sociedade civil galega desexan que a Corporación de Chantada se sume a súa campaña para que rectifique o Goberno español con relación ao Sahara Occidental.

IMG-20220322-WA0019
Crianzas saharauís vestidas con fato tradicional nunha das xornadas de achegamento ao pobo saharauí que se facían en Chantada en espazos como a praza do Cantón, a Casa da Mocidade… Veñen de lonxe os lazos e as ligazóns entre Chantada e o Sáhara. Foto: Por Chantada-CUP.

Por Chantada, como partícipe da Rede Galega de Refuxiad@s desde a súa constitución en 2015, canaliza ao Pleno da Corporación, xa que logo, a demanda do Fondo Galego de Cooperación e Solidariedade e da sociedade civil galega, lembrando igualmente que a rede nacera con motivo da guerra de Siria, que segue hoxe activa sen que finalmente se acollese nengunha persoa refuxiada no noso territorio e pondo de relevo – como Libia, o Curdistán, Afganistán, Iraque, Iemen, Chiapas, Colombia– que hai pobos e guerras de varias categorías e que se impón o cinismo, a hipocrisía e o unilateralismo nas relacións internacionais nunha deriva tan perigosa canto coñecida historicamente e que un dos historiadores máis recoñecidos do século XX, Eric Hobsbawm, cualificou de «imperialismo dos Direitos Humanos».

Desta arte,  o grupo municipal Por Chantada-CUP propón ao pleno da Corporación do Concello de Chantada adoptar a seguinte

DECLARACIÓN INSTITUCIONAL DO CONCELLO DE CHANTADA PERANTE A MUDANZA DE POSTURA DO GOBERNO DO REINO DE ESPAÑA SOBRE O SAHARA OCCIDENTAL

IMG-20220322-WA0016
Crianzas saharauís eran acollidas por chantadeses durante os veraos. Na imaxe, dous saharauís nun batuxo no río Miño. Foto: Por Chantada.

O Concello de Chantada, Fondo Galego de Cooperación e Solidariedade e a sociedade civil galega amosan o seu fondo desacordo co recente cambio de postura sobre o Sáhara Occidental do Goberno do Reino de España. Despois de avalar durante décadas o referendo de autodeterminación auspiciado pola ONU e que se ampara no direito de autodeterminación recollido no direito internacional, o Ministerio de Asuntos Exteriores defende agora que a República Árabe Saharauí Democrática (RASD), recoñecida por máis de 80 estados, se converta nunha rexión autónoma dentro de Marrocos, pregándose así ás demandas do reino alauita.

O Estado Español ten unha responsabilidade ineludíbel co pobo saharauí após un pésimo proceso de descolonización que, a partir de 1975 coa denominada “Marcha Verde”, facilitou a ocupación do territorio por parte de Marrocos e obrigou á poboación local a fuxir cara Alxeria, onde hoxe máis de 170.000 persoas subsisten como refuxiadas grazas á axuda humanitaria nos campamentos de Tindouf, no canto de viver dos recursos naturais que tiñan nas súas terras, por exemplo as maiores reservas de fosfatos do mundo, esenciais para obter fósforo e fertilizantes. As tres cuartas partes das reservas de fosfatos de boa calidade que restan no mundo están no Sahara Occidental. De feito, os fosfatos representan 20% das exportacións de Marrocos -que xunto con China e os Estados Unidos acaparan a maior parte da oferta- e teñen un peso de aproximadamente 5% do seu PIB. Outro grande recurso son os caladoiros de pesca, arrasados por Marrocos e a UE.

Hogano, segue estando invadido por Marrocos o 80% da que fora a provincia número 53 do Estado español, separado por un muro de máis de 2.700 quilómetros das zonas liberadas pola Fronte Polisario, muro no que desde novembro de 2020 retomouse o confronto armado en condicións penosamente desiguais. Nos territorios ocupados, a violación dos dereitos humanos é continua, tal e como denuncian organizacións especializadas, malia o “apagón informativo” que impide acceder e reportar con liberdade desde estes lugares.

Ante esta situación, o Fondo Galego e o Concello de Chantada denuncian que os intereses económicos e xeopolíticos non poden estar por enriba do compromiso adquirido co pobo saharauí, ao que o Estado Español non pode abandonar, unha vez máis, á súa sorte. Especialmente, tendo en conta o movemento solidario e a vontade expresada pola sociedade civil na Galiza e en Chantada. No noso concello existen tamén sólidos lazos de unión pola presenza de chantadeses nos campamentos saharauis ou polos programas de acollida de crianzas e adolescentes que se desenvolveron durante anos.

Desde Chantada apostamos por unha saída dialogada ao conflito, que supón a posta en práctica do Plano de Arranxo subscrito en 1991 con mediación de Nacións Unidas e da Organización para a Unidade Africana. Isto implica celebrar o referendo de autodeterminación acordado por ambas as dúas partes. Ao mesmo tempo, reclamamos o cesamento inmediato da violencia e que as institucións internacionais adopten medidas fronte a impunidade coa que Marrocos continúa actuando no Sáhara Occidental. Agardamos que tanto a comunidade internacional como o Goberno Español estean á altura das circunstancias e mostramos toda a nosa solidariedade coa República Árabe Saharauí Democrática (RASD).

IMG-20220322-WA0022

Accede á moción íntegra en PDF: Moción Por Chantada DI Sahara

Por Chantada apresenta moción para garantir itinerarios accesíbeis aos peóns.

Consulta a nosa moción íntegra en PDF aquí: Moción Por Chantada itinerario peonil accesíbel

distanciasDimensións mínimas dun itenerario peonil accesíbel segundo a lexislación vixente. Fonte: http://www.oaamb.com

A atención das necesidades das persoas con discapacidade é un principio reitor da política social e económica proclamado na Constitución que obriga, por conseguinte, todos os poderes públicos e que se inscrebe no direito internacional através da Convención sobre os dereitos das persoas con discapacidade de 2006, ratificada polo Reino de España en 2007, que estabelece que os poderes públicos deberán asegurar que as vías públicas sexan accesíbeis para as persoas con discapacidade.

A Orde TMA/851/2021, do 23 de xullo, pola que se desenvolve o documento técnico das condicións básicas de accesibilidade e non discriminación para o acceso e a utilización dos espazos públicos urbanizados impón a necesidade de garantir o uso e a circulación de forma segura, cómoda, autónoma e continua de todas as persoas polos itinerarios peonís. Para iso, recolle unha serie de requisitos, entre os que podemos destacar a necesidade de que os ditos itinerarios linden coa liña de fachada a nivel do chan ou, de non ser posíbel, de que se usen pavimentos táctiles para sinalalose de que conten cunha anchura e cunha altura libres de paso non inferiores a 1,8 m e a 2,2 m respectivamente.

En numerosos puntos do casco urbano de Chantada faise patente un incumprimento claro da normativa en materia de accesibilidade, pois existen terrazas instaladas no espazo próximo á liña de fachada sen que exista un pavimento táctil indicador do itinerario peonil substitutivo. Isto supón, como razoa o Tribunal Supremo (Sentenza 354/2019, do 11 de febreiro), unha limitación do dereito de mobilidade polos espazos públicos das persoas con discapacidade que, no caso de Chantada, alcanza unha intensidade preocupante e que se está producindo coa total connivencia do Goberno municipal que leva anos adiando o debate e aprobación dunha ordenanza acorde cos tempos, as necesidades e os diferentes intereses en concorrencia, así como adiou sempre adaptar a mobilidade da vila ás persoas con mobilidade reducida.

O cumprimento desta regulación técnica debe entenderse como unha cuestión de primeira orde, por canto implica garantir a igualdade de dereitos das persoas con discapacidade visual e poñer fin a situacións de discriminación que conculcan o principio de igualdade, valor superior do noso ordenamento xurídico e núcleo duro da Constitución.

paso peónsFonte: Junta de Andalucía. Este organismo ten editado vídeos explicativos que son moi gráficos, por exemplo sobre vados ou itenerario peonil.

Que propón POR CHANTADA?

1.- Adoptar o compromiso como Corporación de respeitar os direitos das persoas con discapacidade e garantir a accesibilidade universal dos espazos públicos. 

2.- Condicionar as autorizacións da Xunta de Goberno Local á instalación de terrazas a que non se sitúen no espazo inmediato de fachada e a que deixen unha anchura e unha altura libres de paso de 1,8 m e de 2,2 m, respectivamente.

3.- A Xunta de Goberno Local deberá requerir a os estabelecementos que conten con terrazas para que garantan que deixen libre o espazo inmediato á liña de fachada, cunha anchura e cunha altura mínimas de 1,8 m e de 2,2 m, respectivamente.

4.- O Goberno municial elevará ao Pleno un informe coas actuación substanciadas en cumprimento desta moción e os puntos en que o itinerario peonil siga sen ser accesíbel nun prazo máximo de seis meses.

cropped-logo-redes-8m-blanco

#construírfuturo

#mellorarChantada

#opartidodaxente

Por Chantada defenderá no pleno unha moción con medidas perante a ofensiva espoliadora eólica e demanda de transparencia na LAT Maxal – encoro de Belesar.

 

Aquí hai varias empresas que queren dar un pelotazo, como no seu día ocorreu co ladrillo. Non hai ningún interese por unha transición enerxética, só pretenden embolsarse diñeiro dos fundos europeus construíndo parques.

Antonio Turiel. Experto en enerxía e doutor en Física que en calidade de autoridade compareceu na Comisión de transición ecolóxica no Senado.

 

 

 

 

IMG-20210730-WA0026
Faixa colocada en San Fiz pola viciñanza ao carón dos cartaces cos que Por Chantada reclamaba a declaración de zona de desastre natural, entre outras medidas, para esta parroquia após a saraibada sufrida no pasado ano. A día de hoxe as persoas afectadas seguen sen calquera axuda da administración. Foto: Observatorio enerxético de Chantada (OECh).

Nos últimos meses estamos asistindo a unha auténtica vaga de proxectos eólicos que ameazan con transformar aínda máis a paisaxe natural e humana das comarcas do noso país e máis unha liña de alta tensión (LAT) pretende vir desde o Maxal até Belesar, con parroquias como San Fiz de Asma totalmente xa saturadas con 39 torretas de alta tensión, cáseque 8 por km2 cando a Xunta ten en tramitación un POMF para esta parroquia, o primeiro da Galiza, que non foca en absoluto esta cuestión, nen moitas outras dito sexa de pasaxe, e cando é unha parroquia en zona BIC (categoría de paisaxe Ribeira Sacra) e incluída na Reserva de biosfera Ribeira Sacra e serras de Oribio e Courel. Para que serven estas figuras de protección alén de criaren marcas territoriais para o turismo? Para complicar a vida a quen aínda resiste no rural mentres se lle agasalla a Terra ás multinacionais?

O proxecto, ao que a Xunta se resiste a darnos acceso a pesar de solicitalo xa no pasado mes de xullo, verá parcialmente soterrada a liña desde o Piñeiro, mais entendemos que nun espazo declarado BIC e que pertence á Reserva de Biosfera o soterramento debería ser na integridade do seu trazado.

No caso do Maxal, tanto o parque canto a LAT, son competencia da Xunta. Sen exposición pública, sen informes sectoriais, sen información algunha… así se confrontaron proprietarios afectados ás “visitas” da empresa para que asinasen a cesión das súas terras, que só serán remuneradas se finalmente se fai a LAT e con contías dispares, dependendo do momento, o cal demostra a alta especulación e abuso que se comete por parte destas empresas. 

Aínda hai pouco, e a pesar de demandarllo por escrito e logo no pleno, o alcalde de Chantada negouse a apoiar a solicitudede Aliente para impulsar unha moratoria para as Reservas de Biosfera, de acordo coa 22ª Reunión ordinaria do Comité Español do Programa MaB correspondente a 2021, que, o pasado 24 de setembro, apresentou informes correspondentes ás incidencias e impactos provocados por proxectos de instalacións de enerxía renovábeis nas Reservas de Biosfera.

A Xunta leva anos criando  ad hoc  normas como a propia Lei Eólica de 2009, e as leis de Fomento de Implantación de Iniciativas Empresariais de 2017 (Lei de predación da Galiza contra a que se pronunciara o pleno do Concello de Chantada) e a recente Lei de Simplificación Administrativa de 2021, facilitan cada vez máis ás empresas desenvolver os seus proxectos en detrimento da participación pública e dos dereitos e intereses das comunidades afectadas. A redución de prazos inserida nesta última colida até coas directivas europeas (Directiva 2011/92/UE e Directiva 2014/51/UE), tal e como se ten pronunciado o TSXG na súa Sentenza 17/2022 de 21 de xaneiro dada a primacía do direito comunitario.

Polo que atinxe aos concellos, estes teñen unha case nula capacidade de intervención e participación na toma de decisións sobre estes proxectos, limitándose a acatar as decisións da Xunta e do Estado. Isto supón un agravio comparativo e un grave prexuízo para as entidades locais cuxos territorios e habitantes teñen que soportar os impactos da implantación destas infraestruturas con moi escasas compensacións económicas.

IMG-20210730-WA0025

Foto: Observatorio Enerxético de Chantada (OECh).

 

Que propón Por Chantada?

1.- A revisión por parte da Xunta do Plano Sectorial Eólico para adaptalo á normativa de Avaliación Ambiental Estratéxica e por parte do Goberno central  a incorporación de criterios de sensibilidade ambiental e afección territorial e social na planificación e regulamentación das enerxías renovábeis, particularmente na Lei do Sector Eléctrico e nos Planos de Fomento das Enerxías Renovábeis.

2.- En consecuencia,  mentres se procede a esa revisión solicitar da Xunta e do Estado unha moratoria real dos novos proxectos eólicos e dos que actualmente se atopan en tramitación e aínda non foran aprobados.

3.- Modificar a actual Lei Eólica galega e o marco regulatorio estatal para garantir a participación municipal e das comunidades locais nos proxectos eólicos, tanto desde o punto de vista impositivo como de promoción propia e participación no accionariado, favorecendo a coxeneración sobre os grandes proxectos primando a fixación de poboación no interior galego.

4.- Reformar o actual Canon Eólico e o Fondo de Compensación Ambiental para gravar a potencia instalada en lugar do número de muíños e permitir aos concellos a xestión directa do Fondo de Compensación.

5.- Crear unha oficina de información para os concellos e o público en xeral que atenda ás consultas e dúbidas sobre a tramitación administrativa dos proxectos eólicos.

6.- Impulsar desde o Concello de Chantada a contratación dunha empresa que asesore e desenvolva alegacións á LAT Belesar – San Fiz para demandar o seu total soterramento e garantir que o valor das terras e os direitos das persoas afectadas se respeitan.

 

Para leres a moción de Por Chantada íntegra en formato PDF preme aquí: Moción Por Chantada eólicos e LAT Maxal

 

EOLICOS_IGV

 

#construírfuturo

#mellorarChantada

#opartidodaxente

 

Modelos de alegación para o novo Catastrazo

catastrazo
Foto: ©Archivo Efe/J. Ragel

A raíz do envío de 4.600 cartas aos chantadeses e ás chantadesas, do que alertamos desde Por Chantada, o Concello contou cunha empresa que informa os afectados, mais non fai alegacións que é o que realmente pode arranxar as deficiencias ou abusos detectados.

Ao non termos capacidade para darvos axuda individualizada a todas as persoas afectadas deixámosvos modelos de alegacións que agardamos vos valan para adaptar e facer as vosas.

Nun caso trátase dunha feita para unha adega, pensando no sector primario que se dedica ao viño, que pasou de uso residencial a agrario, co que lle baixou moitísimo o valor cadastral; e noutra, para un establo que xa se destinaba unicamente ao autoconsumo – por exemplo persoas xubiladas – e non xa á produción de leite e ao que tamén lle baixou o valor. Por último, vai un recurso de reposición xenérico con alegacións para calquera outro tipo de edificación. Este último conseguiu no anterior catastrazo unha redución de 50% do valor catastral e, xa que logo, unha redución significativa da cota a pagar de IBI (“contribución”) cada ano ao Concello de Chantada.

Naturalmente, convén que anexedes fotos do interior e do exterior onde se poida comprobar que efectivamente o uso é o que indicades, por exemplo agrícola fronte a almacén ou garaxe que pagan máis.

Alegacións adega Catastrazo 2022

Alegacións establo Catastrazo 2022

Alegacións outras Catastrazo 2022

Para calquera aclaración ficamos, como de costume, ao voso dispor e agrademento especial para aquelas persoas que colaboraron con nós para a confección destes modelos.

#construírfuturo

#mellorarChantada

#opartidodaxente

Comprometidos cun interior galego vivo

POR CHANTADA DENUNCIA OUTRO CATASTRAZO EN CHANTADA E ADVIRTE QUE SE PODEN PRODUCIR ATÉ 4.600 NOVOS SABLAZOS

catastrazo

Foto: ©Archivo Efe/J. Ragel

  • Exiximos sentido común ás administracións para que se deteña a aplicación disparatada dunha fiscalidade absurda para o rural e contraria ao direito consuetudinario galego.

  • Demandamos que o Concello de Chantada poña medios de asesoramento legal específico para que a viciñanza poda facer fronte, nos exiguos 15 días de prazo que se lle conceden, ao alude de cartas que están chegando desde Catastro, até 4.600 só no termo municipal de Chantada.

Comprometidos cun interior galego vivo

 

Unha empresa subcontratada está, teoricamente, mapeando as “zonas brancas” do Concello de Chantada para inventariar bens catastrais que, até agora, non constaban. Porén, están procedendo a alterar as superficies e os valores tamén de bens que xa estaban tributando e, na maior parte dos casos, con incrementos dos valores substanciais que, practicamente, duplican os até agora vixentes. Isto vai supor que a cidadanía do rural verá incrementados os recibos anuais que pagan polo IBI, a chamada popularmente como “contribución”. Tamén cómpre estar de ollo nos usos, xa que fronte ao uso agrario que paga menos hai tendencia a inventariar como “garaxes” ou usos “industriais” edificacións de uso agrario como pallares, alpendres e outras construcións anexas de escaso ou nulo valor de mercado real.

Por Chantada reitera o xa denunciado tamén no anterior Catastrazo, derivado da Lei Montoro, en referencia ao Ministro de Facenda do Goberno de Mariano Rajoy: o inxusto que é para moitos pensionistas seguir tributando (IBI) por cortes e naves que xa non empregan e que, ao non teren valor de mercado no rural non poden tampouco vender nen arrendar. É mester que o Catastro evite a catalogación de bens inmóbeis rústicos do rural (granxas, galpóns, naves) como bens urbanos e dispare valores catastrais que afectan negativamente ás familias do rural (desde bolsas de estudos até herdanzas).

Lembremos que só o anterior Catastrazo, na secuencia da crise de 2008, elevou en máis de 600.000€ a recadación anual do IBI urbano, tal e como xa advertimos no seu momento. Agora vólvese a un proceso análogo no cadro da crise da COVID-19 e nun medio rural castigadísimo polos prezos do leite que non atinxen os custes de produción, a saraibada en San Fiz ou o efeito da inflación (6% actual) na maioría das cativas pensións do noso campo.

De por parte, o Ministerio de Facenda incluíu nos Orzamentos Xerais do Estado de 2022 a actualización dos valores catastrais de até 825.000 inmóbeis. É penoso que a urxencia estexa nas zonas brancas do medio rural e non nas áreas urbanas ou de maior especulación co prezo da vivenda, onde actúan as plataformas dixitais que fomentan a xentrificación.

Resulta sorprendente que casas con grande antigüidade se vexan revalorizadas en máis do duplo sen sufriren reformas nen ampliacións ou mesmo cando se lles reduce a superficie. A Orde HFP/1104/2021, de 7 de outubro, pola que se aproba o factor de minoración aplicábel para a determinación dos valores de referencia dos inmóbeis confirma a elevación do factor até 0.9% (o factor até agora vixente era do 0.5%) para os bens inmóbeis de natureza urbana e os de rústica que non superen o valor de mercado. Esta elevación posibilitouna a entrada en vigor da Lei de Loita contra a Fraude impulsada polo Goberno de Pedro Sánchez(BOE 10/07/2021).

Por exemplo, se escrituramos unha vivenda de segunda mao por 20.000 euros, mais o seu valor de mercado é de 30.000 euros debemos tributar sobre esta segunda base impoñíbel sobre a que se calcularían os impostos afectados de 27.000 euros (antes só 15.000€). E, de existir desconformidade, correspondería ás partes da compra-venda demostrar que o valor de mercado está por debaixo do valor de referencia para o inmóbel segundo Catastro, o que é especialmente lesivo para o medio rural, se ben ten todo o sentido nos ámbitos propiamente urbanos.

En resumo, a revalorización catastral afecta ao IBI que pagamos cada ano se se eleva e as persoas afectadas teñen 15 días para reclamar. Alén diso, a o incremento do factor de minorización vai facer que aumente a base impoñíbel para vendas, transmisións, etc. e aplicarase a todos os bens, con independencia de que chegue carta ou non, nas operacións a partir do 1 de xaneiro de 2022. Por todo isto, Por Chantada e Interior Galego Vivo demandan unha fiscalidade propria para o campo e que non expulse a poboación ou sanee as contas municipais a conta de sangrar a viciñanza que aínda resiste nas aldeas. Deixen de mallar nos mesmos de sempre.

Por último, demandamos que o Concello de Chantada poña medios de asesoramento legal específico para que a viciñanza poda facer fronte, nos exiguos 15 días de prazo que se lle conceden, ao alude de 4.600 cartas que chegaron só no termo municipal de Chantada.

 

NOVAS RELACIONADAS:

  • Remitir á Deputación de Lugo, á Xunta e ao Estado a seguinte declaración institucional:
    O concello de Chantada considera que debe adaptarse ao rural e á realidade galega a regularización catastral, xa que é un imposto que grava a riqueza e resulta lesivo para o campo galego, e demanda das diversas institucións que arbitren medidas neste sentido. A Corporación chantadina entende que:
    a.- A regularización ignora a realidade agraria galega, equiparando todo volume no rural a un estabelecemento de natureza produtiva, cando por veces serve ao autoconsumo e outras está desprovisto de rendemento económico.
    b.- A regularización catastral, debido á forma de actuación seguida fai recaer sobre o contribuínte a carga de solventar os erros da actualización, que se fai moitas veces sen coñecer o terreo, ignorando o contido real dos volumes, a súa función económica e mesmo a superficie real.
    c.- A regularización ignora a estrutura da propiedade agraria galega, pois ao existiren un grande número de pequenas parcelas cómpre para unha mesma explotación numerosas infraestruturas, sendo moitas até de construción tradicional que ficaron en desuso por non se axustar as novas necesidades das explotacións. Isto non supón máis riqueza, senón que é unha característica da fragmentación parcelaria.
    d.- A desconexión con outras normas xurídicas fai que o Real Decreto 595/2015 deixe fóra das bolsas de estudos a familias, dado que a regularización aumenta artificialmente o seu patrimonio damnificando o mundo labrego por partida dupla.
    Por iso, a CORPORACIÓN do CONCELLO DE CHANTADA considera axeitado DEMANDAR das diversas institucións:
    a.- Un redeseño deste imposto adaptado á realidade rural galega, onde se teñan en conta as variábeis antes citadas e se busque gravar a riqueza onde realmente existe. O sistema de corrección que teñen os concellos, estabelecendo deducións ou bonificacións e moi limitado e imperfecto, pola falta de competencia para axustarmos a realidade catastral ao estimado.
    b.- Amais, o IBI é nestes tempos unha fonte de ingresos estábel á que as maltreitas facendas locais non podemos renunciar. Con todo, deberían estabelecerse con urxencia supostos de non suxeición ao imposto nos seguintes casos:
    – volumes sen valor económico ou destinados ao autoconsumo;
    – deducións e bonificacións obxectivas en instalacións agrarias en función do emprego que xeren, do seu carácter ecolóxico ou da incorporación de sistemas de eficiencia enerxética;
    – deducións e bonificacións subxectivas, cando se trate de titulares xubilados, familias numerosas, novas incorporacións á actividade agraria, ou de unidades familiares complexas:
    – ou mesmo deducións a totalidade dos pequenos produtores como parte da súa contribución á ordenación do territorio e a loita contra os incendios aos que a Xunta destinou só en 2015 160 millóns de euros, o 90% para extinción e o 10% para prevención.

     

 

Captura de pantalla 2019-04-21 a las 10.27.36

 

Orzamento 2022 [documentación]

Captura de pantalla 2019-04-21 a las 10.27.36

0.- PROPOSTA APROBACION ORZAMENTO 2022

0.1.- ESTADO DE GASTOS E INGRESOS.- RESUMO CAPITULOS

0.2- DECRETO 2022-0002 [PRORROGA ORZAMENTO 2022]

1.- Informe_ SECRETARIA 2022-0001

2.- Informe_INTERVENCION 2022-0001

3.- BASES EXECUCION ORZAMENTO 2022

4.- INFORME ECONÓMICO-FINANCEIRO 2022

5.- MEMORIA 2022

6.- ORZAMENTO DE INGRESOS

6.1.- INGRESOS POR CAPITULO E ARTIGO

6.2.- INGRESOS POR CONCEPTO

7.- ORZAMENTO DE GASTOS

7.1.- GASTOS POR PROGRAMA

7.2.- RESUMO POR CAPITULO E ARTIGO

7.3.- GASTOS POR CAPITULO, ARTICULO,CONCEPTO

7.4.- GASTOS .- RESUMO POR AREAS E ARTIGO

7.5.- AREA DE GASTO-POLITICA GRUPOMPROGRAMA

ANEXO I PERSOAL

ANEXO I.- PLANTILLA PERSOAL 2022

ANEXO II.- CONVENIOS 2022

ANEXO III.- SUBVENCIONS 2022

ANEXO IV.- INVESTIMENTOS 2022

ANEXO V.- BENEFICIOS FISCAIS

AVATAR 25xullo