Por Chantada denuncia desleixo municipal fronte a falla de prazas de infantil e propón medidas para a conciliación.

Ouvidas as demandas das familias e dado que xa é un problema crónico sen que o Concello adopte medidas concretas apresentaremos unha moción para ampliar a Galiza Azul de Chantada cun novo módulo, así como outras melloras para a mesma, xunto a medidas que favorecen a conciliación.

10028

 

Na listaxe de agarda definitiva do baremo ordinario para o curso 2021-2022 figuran 10 alumnos e na provisional 13. Algunhas familias encontraron praza noutra escola (Taboada, Barrela, Lalín e Vilamarín) cos prexuízos que trae consigo e pondo en risco que parellas mozas se formulen deixar de tecer o seu proxecto de vida aquí, un luxo que non podemos permitirnos. Porén, o pior está por chegar, xa que en setembro e decembro haberá novos demandantes, mais non prazas, polo que a listaxe de agarda será substancialmente maior.

Para alén de vagas promesas sen concreción algunha, como unha nova escola que tería que financiar o Concello e que sairía moitísimo máis cara que ampliar a actual, o Goberno de Manuel Varela segue sen facer absolutamente nada. Ten algún interese inconfesábel en cronificar esta situación?

 

30/06/2021
 
 
A atención da infancia de 0 a 3 anos é un servizo esencial para a conciliación da vida laboral e familiar e para a igualdade entre homes e mulleres. Por outra parte, cada vez máis, demóstrase que a etapa educativa dos 0 aos 3 anos é esencial para garantir a igualdade de oportunidades no acceso á educación e nos resultados académicos posteriores entre nenos e nenas, e constitúe un servizo indicado para reducir os índices de risco de pobreza infantil e as consecuencias desta situación na infancia, para alén que cada euro investido en educación ten un retorno de sete, segundo o premio Nobel de economía Stiglitz
 

Na Galiza, esta etapa depende da Consellería de Política Social e conta con disparidade de acceso e de servizos no territorio, non garantíndose unha rede pública, gratuíta e universal. En todo o sul de Lugo só hai 258 prazas públicas en escolas infantís da Xunta, máis 5 en Casa Niño.

Por todo isto, xa na pasada lexislatura rexistraramos, en 22 de decembro de 2017, a Moción de PorChantada-CUP a prol das escolas infantís na provincia de Lugo, aprobada por 11 votos a favor (Por Chantada, PSOE e Inta) e dúas abstencións (PP). Pedíanse 700 novas prazas para a provincia de Lugo, segundo a listaxe de agarda daquela altura, e un novo módulo para a Galiña Azul de Chantada, lembrándolle ao PP na Xunta que estaban apoiando máis as gardarías privadas cás públicas. Porén, a persistencia de familias sen praza anos após ano levounos a desenvolver parte do noso programa sobre a infancia através da Moción de Por Chantada-CUP sobreadopción de medidas necesarias na Escola Infantil e para ampliacióndas prazas públicas (novembro de 2019), que foi rexeitada polo PP (ex-Inta).

Para alén de vagas promesas sen concreción algunha, como unha nova escola que tería que financiar o Concello e que sairía moitísimo máis cara que ampliar a actual, o Goberno de Manuel Varela segue sen facer absolutamente nada. Ten algún interese inconfesábel en cronificar esta situación?

Cos dados da serie histórica na mao, en varios baremos Chantada apresentaba a segunda listaxe de agarda máis elevada da provincia, só por detrás de Lugo que ten máis de 80.000 habitantes fronte os 8.000 escasos de Chantada. Constátase así ano unha infradotación de prazas no noso Concello, cando o problema demográfico é unha cuestión fulcral e as políticas de conciliación e de axuda ás familias deberían ser prioridade nas axendas das institucións para loitar por un rural e un interior galego vivos.

Desta arte, Por Chantada entende, así como moitas familias que teñen transmitido o seu malestar, que é urxente negociar co goberno da Xunta para propoñer unha ampliación de outra unidade da Escola como xa nos pronunciamos en xaneiro de 2018 desde esta Corporación e facelo, asociándoo a xestións concretas por parte do Goberno e através dos Fundos europeos (FEDER). Nesta cuestión todas e todos temos que camiñar na mesma dirección e cunha única voz.

Sería tamén o momento de pular polo consumo de alimentos de proximidade e non polo catering privado. As cantinas escolares teñen un papel central para unha cociña colectiva artesá, pública e social que vertebre a comunidade educativa.

 

QUE PROPOMOS?

1.- Convenio entre o Concello de Chantada e a Xunta para dotar a escola infantil dun novo módulo e unha cociña ou no seu defeito, explorar fórmulas para empregar alimentos locais e as cociñas dos CEIP.

2.- Compromiso municipal de achegar a asignación económica que complemente os Fundos Feder da Unión europea cos que se farían estas actuacións.

3.- Exixirlle á Xunta que universalice a atención educativa de 0-3 anos como servizo público para a educación á infancia e contribúir á conciliación.

4.- Trasladar ao Goberno do Estado a necesidade de aumentar os permisos retribuídos por maternidade e parternidadade até un ano de duración con cargo á Administración Xeral do Estado.

5.- Impulsar unha Mesa de Traballo entre os concellos da zona sul de Lugo para homologar as condicións das diferentes escolas infantís e solicitar máis prazas á Xunta até cobrir a demanda existente e as previsións a futuro.

 

Chantada, 30 de xuño de 2021.

 

Poder ler íntegra a nosa moción aquí: Moción Por Chantada Galiña Azul e conciliación

 

GRUPO MUNICIPAL POR CHANTADA – CANDIDATURA DE UNIDADE POPULAR.

 

Captura de pantalla 2019-04-21 a las 10.27.36

 


𝐋𝐢𝐦𝐩𝐞𝐳𝐚 𝐝𝐞 𝐟𝐢𝐧𝐜𝐚𝐬 𝐩𝐫ó𝐱𝐢𝐦𝐚𝐬 𝐚𝐨𝐬 𝐧ú𝐜𝐥𝐞𝐨𝐬 𝐫𝐮𝐫𝐚𝐢𝐬

Limpa a túa finca

O prazo para “limpar” as fincas de maleza remata 31 de maio, como medida preventiva contra o lume estabelecida Lei 3/2007, do 3 de abril, de prevención de incendios forestais (DOG do 17 de abril de 2007), modificada posteriormente pola Lei 7/2912 de Montes da Galiza (DOGA do luns 23 de xullo de 2012).

Quen é o responsábel da xestión da biomasa vexetal? 

As persoas proprietarias ou os usufrutuarios dos terreos (artigos 21 e 22) incluídos nas faixas de especial protección de núcleos. Se non actúan os responsábeis, compete aos concellos executar a limpeza e repercutirlle os custos.

Deben xestionar a biomasa vexetal nun perímetro de 50 metros ao solo urbano de núcleo rural e urbanizábel delimitado, así como arredor de edificacións, vivendas illadas e urbanizacións. No caso de depósitos de lixo, parques e instalacións industriais, ubicadas a menos de 400 metros do monte, medirase desde límite das instalacións.

Especies prohibidas nas faixas de seguranza: piñeiros, eucaliptos, acacias, toxos, fentos, mimosas, xestas, carqueixa, piorno, carrasca (queiruga), silvas (Disposición transitoria terceira.

A empresa pública Seaga, nas áreas de maior risco (ZAR), fará limpezas a un prezo de 350€ por hectárea. Chantada está en ZAR, mais o Concello de Chantada é un dos poucos da Galiza que non asinaron o covenio polo que os proprietarios non se poden acoller a esta opción. 🤬 𝐎𝐮𝐭𝐫𝐨 𝐠𝐫𝐚𝐧𝐝𝐞 é𝐱𝐢𝐭𝐨 𝐝𝐨 𝐆𝐨𝐛𝐞𝐫𝐧𝐨 𝐝𝐨 𝐩𝐢𝐥𝐨𝐭𝐨 𝐚𝐮𝐭𝐨𝐦á𝐭𝐢𝐜𝐨 𝐝𝐞 𝐌𝐚𝐧𝐮𝐞𝐥 𝐕𝐚𝐫𝐞𝐥𝐚…

#construírfuturo

#mellorarChantada

#opartidodaxente

Por Chantada propón mudanzas nas ordenanzas para atinxir as metas de descarbonización.

 

Podes consultar a moción íntegra premendo aquí: Moción do grupo municipal Por Chantada – Candidatura de Unidade Popular para favorecer a descarbonización mediante modificacións nas ordenanzas municipais.

 
Praza do Cantón (peonil mais con carros)
A pesares da peonalización da praza do Cantón nesta lexislatura os vehículos seguen estacionando con total impunidade. Foto: Por Chantada.
 
 
 

A candidatura viciñal Por Chantada defenderá na vindeira sesión plenaria unha Moción para favorecer a descarbonización mediante modificacións nas ordenanzas municipais. Esta moción complementa outras medidas propostas xa en decembro de 2019 co gallo de irmos avanzando nas metas fixadas para descarbonizar Europa. De feito,o 13 de maio aprobouse a primeira Lei de mudanza climática do Reino de España, que chega cinco anos após o Acordo de París.

A norma estabelece que os concellos de máis de 50.000 habitantes deberán contar con «zonas de baixas emisións» antes de 2023 onde non poderían acceder 40% dos turismos que actualmente existen. No 2040 todos os turismos e vehículos comerciais lixeiros novos á venda deberán ser de cero emisións e en 2050 todo o parque de turismos e vehículos comerciais lixeiros deberá ser de cero emisións. Pode parecer moito tempo, mais non o é para unha transformación de tanto calado na mobilidade que, con certeza, requirirá aínda futuras restricións.

Xa no 2030 o sistema eléctrico terá que ter orixe en enerxías renovábeis nun 74% como parte da estratexia para mitigar as emisións de gases de efeito estufa (GEE) en 23%, a respeito de 1990. Contodo, convén subliñar que a Galiza produciu desde fontes renovábeis xa en 2020 75% da súa enerxía, polo que non se sustenta o boom especulativo dos eólicos que non deixan no territorio e nas poboacións máis ca externalidades negativas en canto a Comunidade de Madrid non ten instalado un só parque eólico. Continúa tamén como materia pendente conseguir que as comarcas netamente secuestradoras de carbono sexan compensadas e que as cotas de carbono teñan ligazón territorial e non se convertan nun novo mercado bursatil e especulativo global.

Amais, cómpre termos en conta que os turismos son os automóbiles que máis peso teñen nas emisións do transporte por superficie (case dous terzos), seguidos polos vehículos pesados ( 30%). Porén, os sucesivos gobernos neglixenciaron o desenvolvemento do tren de proximidade, tan común nos estados centrais da UE-15, e investiron sumas estratosféricas en autoestradas e infraestruturas que, para maior INRI, debían sempre pasar polo sumidoiro de recursos que é Madrid. A consecuencia é unha brutal desvertebración territorial.

 

Chantada no contexto da descarbonización.

O Concello de Chantada aprobou un plano de acción (PACES) unilateralmente, sen contar coas achegas do noso grupo, e nun documento que recorre ao plaxio da Wikipedia, entre outras deficiencias manifestas, o Goberno local optou por sacar adiante un documento que fixa unha redución de 40% para 2030 nas emisións de CO2, sendo o sector da mobilidade o de maior peso nas emisións de gases de efeito estufa (GEE).

O Imposto sobre vehículos de tracción mecánica (IVTM) é un tributo directo que grava a titularidade dos vehículos de tracción mecánica e a ordenanza municipal do IVTM do Concello de Chantada non contempla bonificación, exención total ou parcial, redución da cota ou calquera outro tipo de minorización do imposto en virtude da incidencia da combustión ou ausencia de combustión no Medio Ambiente. Para rachar con esta disfunción entre as ordenanzas e as declaracións, Por Chantada propón a adopción de mudanzas na ordenanza IVTM.

Segundo Decreto de alcaldía 128/2021, de 24 de febreiro, no 2021 ingresaranse en conceito de IVTM 370.111,67€ e dado o parque de vehículos actual, bastante envellecido, a nosa proposta de bonificación podería redundar en incentivar o carro eléctrico sen por iso ter un elevado impacto na facenda local, reiterando a nosa posición de preferencia polas bonificacións fronte as rebaixas do tipo xeral. Así é, porque acreditamos que son necesarios ingresos para termos uns bons servizos públicos, aínda que para iso haxa que optimizar tamén a Administración e, como non, ter un Goberno competente e eficaz.

Asemade, cómpre lembrar que o carro eléctrico non diminúe apenas as emisións de GEE, mais tamén reduce a contaminación acústica, redundando en vilas con contornas máis amábeis para as persoas. No entanto, tamén se torna imprescindíbel preparar con tempo a chegada dos vehículos eléctricos cun Plano de mobilidade eléctrica do Concello de Chantada, que planifique os pontos de recarga na vía pública e bonifique a criazón e reforma de infraestruturas (prazas de garaxe residenciais, vías públicas e centros de traballo). Isto require atender a outras ordenanzas fiscais como a do ICIO.

Por todo o exposto anteriormente, o grupo municipal Por Chantada-CUP propón ao Pleno da Corporación do Concello de Chantada o seguinte ACORDO:

1.- Elaborar informe técnico que permita modificar a ordenanza IVTM do Concello de Chantada na liña de bonificar ou minorar o imposto por aqueles vehículos eléctricos ou híbridos debidamente homologados e acreditados nos termos expostos na exposición de motivos desta moción.

2.- Comunicar dito informe aos grupos políticos da Corporación.

3.- Acordar entre os grupos, na CI de economía e facenda, a porcentaxe de redución a aplicar en virtude dos tipos de vehículos para a reforma da ordenanza IVTM.

4.- Planificar o proceso coa celeridade e antelación suficiente para que poda entrar en vigor no exercicio fiscal 2022.

5.- Informes técnicos para modificar a ordenanza fiscal reguladora do imposto sobre construcións, instalacións e obras (ICIO), na orde de incorporar unha bonificación á taxa a pagar nas obras para axeitar garaxes comunitarios particulares para a recargar as baterías dos vehículos eléctricos e outras actuacións orientadas a mitigar a mudanza climática.

6.- Publicar no site do Concello estes acordos durante un mes e notificar á AECH, centros educativos, organizacións agrarias (SLG, ICOS, UUAA) e organizacións ligadas co desenvolvemento sustentábel, para que acheguen aquelas suxestións de mellora que estimen convenientes dando así pé á participación cidadá en cumprimento ás recomendacións en materia de transparencia e bo goberno da UE.

7.- Configurar unha equipa de traballo con persoal técnico e representantes municipais dos diferentes grupos que elabore un Plano de mobilidade eléctrica do Concello de Chantada (2023-2030). Entre outras cuestións atenderá a planificar os pontos de recarga na vía pública e a renovación de vehículos municipais que contemple a compra de vehículos eléctricos sempre que for posíbel.

 

 

O Concello de Chantada perdeu 6 meses sen adoptar accións para adaptar a vila a nova normativa de circulación nas vías urbanas.

IMG_20210511_132626_1

Imaxe do mesmo día en que entra en vigor o novo regulamento. O Goberno municipal, a diferenza doutros concellos galegos, non adoptou nengunha medida nos seis meses que se daban aos entes locais para adaptar a sinaléctica e a normativa local ao novo regulamento.

 

Chantada, 11 de maio de 2021. 

 

O Consello de Ministros (Goberno de España) aprobou o pasado 10 de novembro unha modificación do Regulamento de Circulación no que se estabelecen novos límites de velocidade en áreas urbanas. Esta modificación concedeu 6 meses para a súa entrada en vigor, para facilitar que os gobernos municipais tiveran tempo suficiente «para adaptar a sinalización e/ou infraestrutura».

Así pois, desde o 11 de maio está en vigor o novo límite de velocidade de 30 km/h en todas as vías urbanas que teñan un carril por cada sentido da circulación. A redución da velocidade a 30 kms./h. en vías urbanas, como recoñece a propia DGT, reduce:

  • nun 80% o risco de morte en caso de atropello;
  • as emisións de CO2, e por tanto o fume e a contaminación;
  • o ruído nas rúas da vila.

No entanto, como de costume, o Goberno de Chantada deixou pasar medio ano sen facer nada e o piloto automático municipal alimenta o caos circulatorio na vila. Debera modificar a ordenanza de circulación, proceder a sinalizar correctamente as vías, etc. 

Por tanto, a partir de hoxe a velocidade no casco urbano de Chantada será de:

  • 20 kms./h. en «vías que dispoñan de plataforma única de calzada e beirarrúa» (por exemplo Rúa do Parque, Rúa da Barxela, Praza de Santa Ana ou Praza da Galiza).
  • 30 kms./h. en «vías dun único carril por sentido de circulación», é dicir, en todas as rúas do núcleo urbano de Chantada, a excepción das que estean na situación anterior.

 

IMG_20210511_133907_1

Por Chantada considera que:

  • O goberno municipal debe de dar explicacións sobre o motivo polo que NON tomou ningunha medida con relación aos novos límites de velocidade: nen sinalización nen cambio en infraestruturas.
  • É necesaria unha reconfiguración da mobilidade na vila de Chantada que:
    • Permita unhas rúas transitábeis para todos e todas: nenos e nenas, persoas maiores e persoas con mobilidade reducida ou calquera outro tipo de diversidade funcional.
    • Aumente a seguranza das persoas.
    • Favoreza o benestar de todos e todas, especialmente das persoas máis vulnerábeis.

Por Chantada solicita que o Concello de Chantada:

  1. Implemente con carácter de urxencia as medidas de seguranza viaria (sinalización horizontal e/ou vertical, adecuación das travesías, etc…) que se adapten á nova normativa de circulación que estabelece os límites de 20 kms./h. e 30 kms./h. e axuden a condutores e peóns.
  2. Modificación da ordenanza municipal de tráfico para adaptala á nova normativa e ás novas necesidades sociais.
  3. Medidas de restrición e racionalización do tránsito que nos leven a cumprir coa normativa autonómica, estatal e europea de mobilidade e accesibilidade universal.
  4. Revisión do mobiliario urbano e sinalización (altura das sinais, colocación, etc…) para que cumpran coa normativa autonómica, estatal e europea de mobilidade e accesibilidade universal.
  5. Medidas para reducir a perigosidade en áreas especialmente sensíbeis: contorna dos centros escolares da Lama das Quendas (CEIP Xoán de Requeixo e IES Lama das Quendas) e entorno da Residencia de Maiores.

 

IMG_20210511_132522

Por Chantada, de sermos goberno, propón para o período 2023-2027:

  • Reestruturación do tráfico e dos aparcamentos na Praza de Santa Ana, con medidas que impidan o aparcamento en toda a praza, agás para a carga e descarga dos comercios, convertendo Santa novamente nun lugar amábel para as persoas.
  • Reestruturación do tráfico e dos aparcamentos nas rúas Xoán XXIII, Ánxel Gómez Montero, Fonte Arcada, entre outras.
  • Auditar os recursos e as accións desenvolvidas pola Policía Local, para mellorar o exercicio das súas competencias e promover as medidas que sexan necesarias co propósito de racionalizar os recursos municipais.
  • Modificación da ordenanza municipal de tráfico para adaptala á nova normativa e ás novas necesidades sociais.

 

IMG_20210511_134556

 

Finalmente, achegamos tamén como anexo o “Manual de aplicación dos novos límites de velocidade en vías urbanas”, elaborado conxuntamente pola Dirección Xeral de Tráfico (DXT) e pola FEMP: GuíaReducida30

 

Chantada, 11 de maio de 2021.

Grupo de traballo de mobilidade da Comisión política de Por Chantada – Candidatura de Unidade Popular.

Captura de pantalla 2019-04-21 a las 10.27.36

O Consorcio de Turismo da Ribeira Sacra debe especular menos co patrimonio cultural.

 
paso RM NG fondo paso Sernande
 
 
A proposta sobre as barcas do Miño evidencia descoñecemento, cando non se conta coa sociedade civil nen se define unha estratexia-marco con viabilidade, e acompaña no tempo o Plan de acción para a paisaxe da Ribeira Sacra que apenas supera os 100.000€ en dúas anualidades e a repartir entre 10 concellos.
 
 
Anuncios sen substancia que nos dirixen ao desastre: un modelo neocolonial e invasivo, de costas aos “indíxenas” e que se fundamenta nunha inventio da  Ribeira Sacra para criar unha marca territorial artificial.
 
 
Fronte a isto, propomos resgatar os valores e os elementos patrimoniais realmente existentes nas comunidades locais, desde unha perspectiva global e coordinada, que permita a participación real da cidadanía. Os habitantes do territorio debemos ser os protagonistas das políticas que se implementen no mesmo para asumilas como proprias e dotalas de viabilidade e sinerxias que retroalimenten a súa eficacia e eficiencia.
 
 
O turismo, se ten unha planificación e unha xestión axeitadas, pode traer beneficios económicos e sociais que poden mellorar a calidade de vida das comunidades, así como xerar oportunidades de emprego. Porén, con esta proposta dos pasos de barca, carente de calquera planificación, con descoñecemento sobre o interese das comunidades locais e dos propios visitantes –como recoñece a propia xerente–, queda en evidencia a incapacidade do Consorcio de Turismo Ribeira Sacra para facer unha xestión axeitada que «poida traer beneficios económicos e sociais para a vida das comunidades»
 
 
O até agora sinalado son as principais conclusións da análise elaborada polo Grupo de traballo de Patrimonio, pertencente á Comisión política de Por Chantada e que se pode ler íntegra no anexo (PDF de 7 páxinas):
 
 
paso RM NM 2

Moción do grupo municipal Por Chantada – Candidatura de Unidade Popular a prol da instalación nos colexios e institutos públicos de purificadores de ar HEPA.

 

Podes ler a nosa moción íntegra aquí (formato PDF): Moción Por Chantada filtros centros educativos

 

Por que apresentamos esta moción?

O curso 2020/2021 está desde o comezo marcado pola pandemía da COVID-19 e, en consecuencia, moitas AMPAs teñen mostrado desacougo e desconcerto en diferentes centros públicos do noso país pola actitude da Consellaría de Educación prohibindo ou pondo atrancos á instalación de purificadores de ar nos centros, a pesar de que,  tornarían as aulas máis seguras tanto para o alumnado canto para o profesorado. Desta arte, desde o grupo municipal Por Chantada-CUP, asumindo este desasosego da nosa viciñanza, dámoslle traslado ao Pleno da Corporación para que se posicione ao respeito á falta dun regulamento de participación viciñal que permitise canalizar a proposta ás proprias AMPAS.

Aproximadamente 80% dos contaxios da covid 19 son vía aerosois, fronte a 20% por fómites e superficies, como veñen divulgando dende hai meses expertos mundiais en aerosois. Por iso, o CSIC, máximo organismo científico do Estado, publica as súas recomendacións para a ventilación das aulas, baseadas nas investigacións máis rigorosas e punteiras, e seguindo a estela do protocolo de Harvard, propoñendo os HEPA como unha axuda indispensábel para mellorar a ventilación das aulas e baixar a carga vírica naquelas circunstancias nas que, por meteoroloxía ou contaminación ambiental (centros en rúas con moito tráfico, por exemplo), non é posíbel manter as xanelas abertas de xeito continuado. E, desde logo, a ciencia insiste na ventilación como punto chave, determinando que os espazos pechados, con pobre ou nula ventilación, agrupamento de persoas falando, cantando ou berrando e sen máscara, por espazo de tempo prolongado, son os escenarios de máximo risco de contraer a COVID-19. Os espazos fechados multiplican por máis de 20 o risco de contaxio e, entre estas contornas atópanse os centros educativos. En consecuencia, debemos utilizar un sistema de capas de protección combinadas (máscara, distancia, hixiene, ventilación natural por xanelas, filtrado de ar).

Amais, no edificio que alberga o Concello de Chantada existe unha problemática ligada ao gas radon. Sobre isto, xa alertamos no pleno ordinario de 8 de maio de 2017, através da Moción de Por Chantada-CUP para impulsar un estudo sobre a incidencia do cancro no Concello de Chantada e a adopción de medidas preventivas fronte a esta doenza. No Pleno ordinario de novembro de 2019 formulamos unha pergunta, xa que fomos coñecedores de elevadísimas medicións deste gas. A resposta foi que se ía arranxar cuns ventiladores.
A día de hoxe a situación non está solventada. Os filtros HEPA, porén, non son eficaces para gases, pasando unha das solucións, complementar da ventilación, pola instalación de filtros de carbón activo que protexan ás persoas traballadoras da casa consistorial.

 

 

Que demandamos concretamente?

1.- O Pleno da Corporación Municipal de Chantada demanda da Consellaría de Educación que permita o fornecemento aos centros educativos de equipos HEPA portátiles para engadir unha capa máis de protección fronte á transmisión da COVID 19, facéndose cargo da devandita instalación e subministro a propia Consellaría.

2.- Comunicar a aprobación desta moción, se for o caso, á Consellería de Educación e a todos os Grupos Parlamentares do Parlamento galego.

3.- O Concello de Chantada estudará a instalación de sistemas de succión e filtros de carbón activo na casa consistorial para lidara co gas radon. Asemade, promoverá campaña informativa sobre os perigos deste gas e instalará medidores en todos os edificios públicos da súa titularidade.

 

 

 

GRUPO MUNICIPAL POR CHANTADA – CANDIDATURA DE UNIDADE POPULAR.

Por Chantada eleva recursos de reposición contra as bases laborais de conserxe e administrativo.

 

No noso labor fiscalizador e para garantir, na medida do posíbel, a igualdade de oportunidades e que primen o mérito e a capacidade elevamos recurso de reposición contra as bases selectivas para a contratación de conserxe e auxiliar administrativo ao entendermos que apresentan manifestas regularidades, a comezar porque non son coincidentes as publicadas na web do Concello de Chantada e no BOP. De por parte, tamén apresentamos un documento con propostas para que se xulgue con xustiza e equidade o coñecemento da lingua galega, xa que o sistema actual de “tradución” é máis proprio de quen aprende latín ou grego clásico que da acreditación da nosa lingua propia.

 

Consulta aquí os documentos íntegros (formato PDF):

Recurso_ PorChantada_bases_bolsa_conserxe 2020

Recurso_ PorChantada_bases_bolsa_administrativo_2020

Sobre a valoración da lingua galega polos tribunais no Concello de Chantada

 

#construírfuturo #mellorarChantada #opartidodaxente

Moción de Por Chantada para o reforzo da sanidade pública, nomeadamente na nosa área sanitaria.

 

A situación sanitaria derivada da pandemía da COVID19 é cada vez máis preocupante e desde marzo non se reforzou a sanidade polo que a sombra de novas restricións é unha evidencia nesta segunda vaga, que semella vai castigar con maior virulencia a nosa comarca cá primeira. Por iso, desde Por Chantada levaremos ao próximo pleno unha Moción para o reforzo da sanidade pública, nomeadamente na nosa área sanitaria, é dicir, no sul de Lugo. Por todo isto, imos seguir traballando en alternativas e demandando que fagamos Política, en maiúscula, e adaptada ao novo mundo que nos tocou viver, xa que nada voltará ser igual.

 

Que pedimos?

👉 Solicitar á Xunta da Galiza que incremente o orzamento sanitario e que garanta que os fondos estatais se destinen á sanidade e á educación pública na Galiza. Nomeadamente, o sul de Lugo precisa un aumento dos recursos para atención primaria e o hospital comarcal.

👉 Que se poña fin ás restricións de acceso aos centros de Saúde, que están limitando as actividades de promoción, prevención e recuperación da saúde da poboación. A atención telefónica debe ser un complemento á atención presencial e non a única opción para a poboación.

👉 Incrementar o persoal dos equipos de Atención Primaria, garantíndolles unhas condicións de traballo dignas, un equipamento adecuado e o libre acceso a probas diagnósticas.

👉 Trasladar á Xunta a esixencia de que cese a política de desmantelamento e feche de servizos do hospital comarcal de Monforte, dotándoo do persoal necesario en cada categoría e contratando as/os especialistas necesarios. Concretamente:
• unha praza de especialista en neuroloxía;
• unha praza de especialista dixestivo;
• unha praza de especialista en cardioloxía;
• unha praza de pediatra en atención primaria para toda a zona, que xa era precisa sen a COVID-19.

👉 Trasladar á Xunta a esixencia de que recupere a área sanitaria de Monforte, con capacidade de xestión.

👉 Trasladar á Xunta a esixencia de que se publiquen as listaxes de espera ocultas – non estruturais – e se acometa un plano de redución das listaxes de agarda e tempos de demora das consultas de atención especializada, probas diagnósticas, cirurxía e procedementos terapéuticos no Hospital de Monforte.

👉 Acabar coa parálise dos servizos hospitalarios, para o que propoñemos crear circuítos separados para persoas coa COVID-19 e con outras patoloxías e abrir os centros pola tarde para acabar o máis pronto posíbel coa enorme listaxe de agarda xerada durante a pandemia.

👉 Dar participación aos concellos e aos representantes da poboación na loita contra a COVID nas áreas sanitarias.

👉 Desenvolver os instrumentos de participación social na sanidade, poñendo en marcha o Consello de Saúde da Galiza e os Consellos de Saúde de Área Sanitaria.

👉 Proporcionar información real e actualizada, das persoas afectadas en cada localidade, para que os Concellos e a poboación, coñezan a transcendencia da pandemía e colaboren activa e responsabelmente na súa solución.

👉 Constituír unha Comisión de coordinación sanitaria comarcal con representantes dos PAC e dos Concellos de Chantada, Carballedo e Taboada. As súas funcións serían partillar informacións, seguir a incidencia comarcal da COVID-19 e propor medidas e proposta para aplicar desde o ámbito municipal na comarca.

 

Podes consultar aquí o texto íntegro da moción en formato PDF: Moción de Por Chantada para o reforzo da sanidade pública, nomeadamente na nosa área sanitaria.

 

#construírfuturo #mellorarChantada #opartidodaxente

 

Por Chantada impulsa unha moción para dotar dunha canle pública galega á mocidade.

 

Mediante esta nota de imprensa damos conta de que, na vindeira sesión ordinaria do Pleno da Corporación de Chantada, defenderemos a Moción do grupo municipal Por Chantada – Candidatura de Unidade Popular para dotar dunha canle pública galega á mocidade, a cal podedes consultar integramente premendo aquí: Moción Por Chantada para dotar dunha canle pública galega á mocidade (arquivo en formato PDF).

Concretamente, demandamos as seguintes cuestións:

👉 Ao Goberno do Estado que a TVE emita os seus contidos con dobraxe ao galego, nomeadamente na programación da canle Clan TV e nos contidos da súa APP. Amais, debe facerse efectivo o compromiso de recepción na Galiza das canles de televisión portuguesas a través da TDT, segundo o contemplado na Carta Europea de Linguas Rexionais ou Minoritarias, máxime ao non existir nengún atranco desde a aprobación, pola banda portuguesa, pola Assembleia da República dunha iniciativa a favor de recibir as televisións e radios portuguesas na Galiza e tamén desde o Parlamento galego.

👉 Á Xunta que adopte medidas e accións precisas para que a Corporación de Radio e Televisión da Galiza (CRTVG) aumente a oferta en galego destinada á infancia e mocidade nas televisións públicas a través dunha canle “Xabarín”, con programación dirixida ao público infantil e xuvenil e dispoñíbel en todas as plataformas de contidos audiovisuais, así como App actualizadas que conten ademais con programas e xogos co fin de garantir nesta canle en galego, a presenza de contidos atractivos, de éxito, actuais e pasados, así como contidos educativos e de produción galega.

👉 Ao Concello a criazón dunha praza para contratar unha persoa técnica en normalización lingüística no Concello de Chantada e pular para que as actividades lúdicas e culturais dirixidas á infancia e á mocidade e financiadas polo Concello de Chantada se desenvolvan en lingua galega.

 

Na exposición de motivos, entre outras cuestións, incidimos en que a  lingua galega é a única oficial no Estado que non conta cunha canle de emisión continuada de programación infantil e xuvenil, a diferenza do que acontece co castelán, co catalán e co éuscaro. O resultado disto é que só 4,6% da programación semanal está en galego, caendo ao 2,7% na fin de semana, o que unido a emerxencia das RRSS e da prevalencia do castelán nas mesmas, así como noutros dispositivos electrónicos de lecer, invisibiliza na práctica a nosa lingua nas camadas máis mozas da poboación. A través de canles como Clan, Super3 ou ETB3 todas as crianzas, rapaces e raparigas do Estado español, agás as galegas, poden gozar dos mellores contidos televisivos na súa lingua.

En consecuencia, na actualidade, a situación da lingua galega entre a mocidade é dramática. Por dar apenas algúns dados: tres de cada catro rapaces e rapazas galegas de 5 a 14 anos (74,88%) son castelanfalantes e só 23,90% sabe falar galego. Daquela, cómpre un compromiso enérxico de todos os poderes públicos a prol da nosa lingua.  Como deixou para a historia escrito Afonso Daniel Rodríguez Castelao no Sempre en Galiza (1944): «unha língoa é mais ca unha obra de arte; é matriz inesgotábel de obras de arte». Así pois, xa que o goberno galego conta con importantes recursos para tornar realidade a demanda cidadá para que o galego estexa presente e dispoñíbel en todos os espazos, nomeadamente para a infancia e a mocidade, é o momento de irmos á fronte a prol das mil primaveras máis para o galego das que falaba Álvaro Cunqueiro.

 

GRUPO MUNICIPAL POR CHANTADA-CANDIDATURA DE UNIDADE POPULAR.

Por Chantada apresentou alegacións ao Real Decreto sobre nutrición do solo.

 

 

 

Preme aquí para veres o documento íntegro das alegacións de Por Chantada.

 

 

O rascuño de Real Decreto polo que se estabelecen normas para a nutrición sustentábel nos solos agrarios (RD) impulsado polo Goberno do Estado esquece máis unha vez a realidade galega e atenta contra todos os sectores agrarios e gandeiros que apostan por modelos sustentábeis polo que, de non atender ás modificacións propostas, terá o efeito contrario aos obxectivos que, teoricamente, procura.

Neste sentido, Por Chantada – Candidatura de Unidade Popular formulou 40 alegacións ao documento e vindicamos novamente normas legais e unha PAC axeitadas para a Galiza e o noso sector primario, fundamental para a comarca de Chantada, que se vería especialmente castigada polas disposicións do RD. Se non se revisa o rascuño inicial no sentido proposto será letal para as pequenas e medianas exploracións galegas, que son a maioría, e atinxe a todos os sectores: o vacún, a carne, o vitícola, o froiteiro, a horta ou o florestal. Todos estes sectores foron defendidos nas nosas alegacións.

A pesares das boas intencións expostas na súa redacción actual o RD apenas favorece o intensivo e determinadas industrias, nomeadamente o sector porcino polo lobbing das organizacións estatais, para alén de impulsar a venda de maquinaria agrícola e a venda de adubos sintéticos moito máis contaminantes. É o mundo ao revés e, coma sempre, esquécese á maioría social que resiste no medio rural producindo.

 

Inxectores de xurro e obrigas burocráticas.

Embora na imprensa o pouco que trascendeu do RD foi a necesidade de inxectores de xurros, resulta que as disposicións son tan lesivas para a Galiza que isto sería o mal menor dentro das novidades que este traerá. Moito piores van ser as enormes obrigas burocráticas: análises de solos e materiais empregados, obrigatoriedade de asesoramento externo privado, caderno de fertilización, restricións ao amoreamento de esterco obviando o sistema tradicional galego de muricos que actúa como semicompostaxe e con nulo impacto ambiental, inspeccións de equipas, planos de adubado etc. Estas medidas van atinxir de cheo a todo o sector primario: desde unha pequena horta ou viñedo até calquera cultivo froiteiro ou florestal.

No caso de Chantada, con titulares de elevada idade, é totalmente surrealista tentar aplicar estas medidas nunha orografía como a dos socalcos da Ribeira Sacra ao ser imposíbel amorear os estercos e enterralos nas catro horas seguintes á súa aplicación e favorecería, por un lado, o abandono, e, por outro lado, o uso de adubos sintéticos que contaminan acuíferos.

 

Non se estabelece a diferenza entre esterco e xurro.

De feito, o RD é tan incompleto e nefasto que non diferenza o esterco do xurro obviando que o primeiro ten menores perdas de amoníaco, maior contido de carbono orgánico e conserva mellor a estrutura do solo, pola mineralización máis lenta e o favorecemento da microbioloxía etc. É unha aberración condenar aos mesmos controis e obrigas (análises, rexistros, sistemas de aplicación, etc.) a unha pequena granxa ecolóxica que elabore esterco do que a unha macroexplotación de porcino sen terra, o cal é un disparate e un auténtico despropósito a nivel ambiental. Tampouco se teñen en conta as características edafoclimáticas da Galiza como se todo o Estado tivese un único tipo de solo e clima e considerando igual unha granxa isolada na montaña do que miles de exploracións concentradas.

 

O eucalipto trátase como SAU.

Outra barbaridade é considerar o cultivo de especies forestais de crecemento rápido como superficie agraria útil. Entre o ano 1985 e 2005 na Galiza 43% da superficie agraria mudou de uso e representa xa menos da cuarta parte da superficie total da Galiza, a metade que na UE, e a perda de SAU entre 1985 de 2015 cífrase entre 160.000 e 185.000 has. As plantacións de eucalipto e piñeiro pasaron a ocupar 378.718 hectáreas máis de territorio, das cales 150.000 hectáreas plantadas en solos agrícolas nos últimos 30 anos. A porcentaxe de superficie florestal que ten xa hoxe a Galiza a respeito do seu territorio (69%) é a mesma que Finlandia e Suecia. En síntese, a menor SAU maior despoboamento e piores condicións para producir alimentos de calidade e sustentábeis no rural en canto os usos alternativos para esa SAU que se perde son incumpatíbeis cun interior galego vivo. O RD acelera a conversión do interior galego nunha Laponia sen renos nen nenos.

 

Impón a necesidade de asesoramento externo.

No tocante a outra novidade como é o asesoramento, obriga a pagarlle a un asesor en fertilización para estercar as fincas sen reparar na extensión da exploración, na súa natureza (autoconsumo ou venda maciza) e no uso de adubos da propria granxa ou non. Para máis Inri, fica a porta aberta a que os asesores teñan relación con comercios agrícolas e empresas de fertilizantes favorecendo o negocio para unha minoría e a ruína da maioría.

 

Impúlsase o uso de lodos de depuradora, refugallos da agroindustria e até residuos plásticos na produción de alimentos.

A realidade supera a ficción. Un decreto que leva a palabra sustentábel no seu nome resulta que permite e incentiva o emprego de lodos de depuradora e outros refugallos da agroindustria, favorecendo que os microplásticos pasen á cadea trófica. O RD mesmo permite até medio quilo de plásticos por tonelada de material, un atentado á saúde da cidadanía e dos propios solos agrarios. Os cidadáns non merecemos gobernos que poñan por cima da nosa saúde e benestar os intereses da agroindustria.

De por parte, os níveis de metais pesados máximos permitidos son obsoletos. Deberíase ter en conta a revisión á baixa que xa fixeron destes valores varias CCAA.

 

Despropósito nas medicións GEI e no tratamento da agricultura ecolóxica.

Outro aspecto a pór en destaque é que a base de dados do Ministerio para calcular as emisións do sector vacún de leite está errada e non cumpre as directrices metodolóxicas internacionais, o cal é especialmente grave e lesivo para a Galiza. Indícanse 0 horas (si o horas!) de pastoreo cando 61,2 % das granxas galegas fan pastoreo con algún ou coa totalidade dos lotes do rabaño (produción, secas e xatas). Amais, en nengún momento se fala dos pastos permanentes, a pesar de seren sistemas de produción máis extensivos e sustentábeis que reducen os gases de efeito estufa (GEI) e crian un solo vivo. Contrasta este maltrato á agricultura ecolóxica coa ausencia de regulación da gandaría intesiva sen base territorial e moito menos se potencia a soberanía alimentar e os alimentos quilómetro 0.

 

Síntese das nosas alternativas.

Así as cousas, Por Chantada defende:

  • Aplicar medidas de discriminación positiva para a produción ecolóxica e as pequenas e medianas granxas familiares e os proxectos agrarios biodiversos.
  • Excepcións no RD para as granxas de pequeno tamaño que practiquen a agricultura sustentábel e que empreguen métodos de aplicación tradicional dos estercos ou que estexan en zonas de alto valor natural ou que sigan prácticas agroecolóxicas en todo o seu conxunto.
  • Normas máis estritas para as granxas sen terra, restricións severas ao uso de lodos de depuradora e refugallos industriais e a consideración como SAU apenas das parcelas destinadas á alimentación humana e animal, nunca o eucalipto.

 

GRUPO MUNICIPAL POR CHANTADA – CANDIDATURA DE UNIDADE POPULAR.