Desde Por Chantada-Candidatura de Unidade Popular levaremos ao vindeiro pleno ordinario de marzo , a través do noso concelleiro e voceiro Antom Fente, unha Moción para impulsar medidas a prol do sector apícola.
Como deixamos claro na moción, a apicultura é unha actividade social e economicamente relevante na Galiza, xa que o sector conta con máis de 160.000 colmeas en 4.000 explotacións diferentes e unha dinámica de crecemento, máis de 70.000 colmeas nos últimos anos. Porén, as importacións de baixa calidade aumentan ao ritmo dunha regulación da etiquetaxe por parte das administracións que non detalla cal é o país de orixe. Nas últimas décadas as importacións duplicaron no Estado, atinxindo xa as 30.000 toneladas anuais. Fundamentalmente desde Arxentina e China entra mel de baixa calidade ou, moitas veces, adulterado, permitindo a normativa etiquetar meles con menos 1% de mel procedente da Unión europea como mistura de meles orixinarios e non orixinarios da UE, o que, evidentemente, ao noso xuízo, é unha estafa ao consumidor e un fraude ao sector que, na Galiza, desenvolve un papel imprescindíbel.
Cómpre lembrar que o consumo de mel galego só ten aspectos positivos: favorece a economía local, fixa poboación no rural, provoca menores impactos ambientais derivados da importación desde longas distancias e é indespensábel para o mantemento da biodiversidade e da produción agraria pola polinización das abellas.
A continuación podedes ler a nosa moción íntegra no seguinte documento (PDF), agardando que sexa do voso agrado: Moción para impulsar medidas a prol do sector apícola
✊ #SomosAlternativa #CUPChantada ✊
Contáctanos en cupchantada@gmail.com.
Por Chantada 