Alcalde catastrófico. Resumo do pleno extraordinario urxente do 15 de xullo de 2021 [audio]

Asistiron 12 concelleiros, ausentándose Daniel Camiñas (PSOE) e incorporándose coa sesión iniciada Pamela (PP). Asistiu como secretario accidental Ledo Cores e 5 persoas no público. 

Baixa o audio do pleno aquí: https://drive.google.com/file/d/1rueqASJpOTH20sNY_8MQZAqPbdQ8Hj19/view?usp=sharing

1.- Votación da urxencia da sesión.

Os voceiros dos grupos deciden renunciar ás dietas da sesión e, por unanimidade dos once concelleiros presentes, apróbase a urxencia da sesión. Neste momento incorpórase a concelleira do PP Pamela.

ACLARACIÓN:

Visto que transcorreu máis dun mes desde a saraibada e máis dunha semana da solicitude das persoas afectadas.

Visto que non existe nengún prazo administrativo que xustifique a urxencia da sesión extraordinaria nen sequera esta se xustifica por parte do alcalde como marca o artigo 79 do ROF para poder convocar unha sesión extraordinaria urxente.

Visto que procedería convocar unha sesión extraordinaria cunha antelación mínima de dous días hábiles.

O Goberno municipal  prescinde unha e outra vez dos procedementos legais estabelecidos.

2.-Escrito das viciñas e viciños proprietarios de parcelas agrícolas das parroquias de Pesqueiras, Sabadelle, San Pedro de Líncora e San Fiz de Asma atinxidos polas treboadas de saraiba dos días 15 e 16 de xuño de 2021. Solicitude de axudas directas á Consellaría de Medio Rural para paliar os danos.

DECRETO 2021-0547 [Decreto da convocatoria]

Emendas Por Chantada pleno extra urxente 15 de xullo 2021

Aquí produciuse un dos episodios máis surrealistas e bochornosos dos que temos memoria. O alcalde leu “de viva voz” unha proposta de acordo que preparou “pola mañá” en canto non permitiu que se votasen nen lesen as proposta que como emendas rexistrou, en tempo e forma, Por Chantada.

A maiores, a proposta do PP estamos certos que foi elaborada desde Santiago (Medio Rural) e nen se nos transmitiu por escrito aos grupos nen aos afectados polo que o alcalde vende a viciñanza ao partido como xa fixera na Deputación de Lugo no seu día. Nas propostas do alcalde hai propostas que non obrigan a nada á Xunta e á Consellaría de Medio Rural, botando todas as demandas sobre o Goberno central ao ser de diferente cor política. Así, procura estafar e tomar por parva a viciñanza e xogar ao tenis politicamente sen solventar a grave situación en que fican moitos damnificados. Amais, adiou calquera proposta da oposición “para o pleno ordinario” e tentou facer demagoxia, como de costume, dicindo que “aínda falei hoxe co conceselleiro”. Unha tomadura de pelo á viciñanza.

O PSOE lembrou que rexistrou unha moción sobre o asunto para o pleno ordinario e lembrou as iniciativas que levou ao parlamento galego, así como a visita que fixeron ás ribeiras in situ e que documentaron con fotos. Raquel entende que a zona catastrófica non sería aplicábel a Chantada.

Desde Por Chantada comezamos sinalando que resulta vergoñento que, nun suceso desta magnitude e transcorrido máis dun mes, non se emitise calquera comunicado oficial por parte do Concello de Chantada. Vergoña allea é o que sente Por Chantada cando ve que son os adegueiros e as viticultoras as que teñen que demandar o que esta cámara debera facer de oficio, é dicir, procurar solucións e dialogar con outras administracións para axilizar as axudas e os apoios. Fente explicou a estimación que elaborou Por Chantada, segundo os dados oficiais coñecidos, polo que as perdas en uva ascenden a máis dun millón de quilos, ao que se suman as de rianxo e froiteiras, muras e infraestruturas de modo que as axudas deberían situarse sobre 2.5 millóns de euros e a liña directa de axudas, polo menos, no millón de euros. Fente explicou tamén a lexislación actual para poder solicitar a zona catastrófica e puxo exemplos de concellos que demandaron esta figura, por exemplo no recente temporal Filomena o alcalde de Madrid e a presidenta Isabel Díaz Ayuso. Son para Madrid e para o PP as leis segundo sopre o ar? 

Explicado este contexto e achegando dados sobre a lexislación e as voluminosas perdas con cifras concretas e detalladas, Antom leu a proposta  de declaración institucional do grupo municipal por Chantada, mais o alcalde xa non lle deixou ler as propostas de actuación concretas que solicitabamos, cortando o debate e obrigando a votar e non deixando que se votasen as nosas emendas. No entanto, xa rexistramos unha moción que recolle as demandas das emendas que apresentamos e que se debaterá no pleno ordinario do 29 de xullo, xunto a outras dúas que apresentamos a maiores:

Moción Por Chantada saraiba San Fiz

Na votación optamos para votar a favor, aínda que nada tivese pés nen cabeza, polo feito de que consideramos que a Corporación debera ter a suficiente altura como para pór os intereses da viciñanza por riba das siglas, se ben este alcalde catastrófico pónnolo moi difícil e o que propuxo non son as axudas reais e directas que demanda o sector. Este goberno do PP non é o que Chantada merece nen está á altura das circunstancias.

Neste asunto, coma sempre, Manuel Lorenzo Varela e o seu Goberno seguen co piloto automático: un mes sen xestionar nen acordar nada, facendo ouvidos xordos ás propostas e demandas da oposición e tiveron que ser os afectados quen lle ensinaran a vía que debían seguir. Non sabemos se atinxiremos a declaración de zona catastrófica mais si que trafegamos e pomos en limpo que timos un alcalde catastrófico. Haberá que aplicar tamén na política local podas en verde, cicatrizantes e antifúnxicos para preservar o futuro da nosa Terra.

Votación: 

A FAVOR: Por Chantada (2) e PP (7)

Abstención: PSOE (3)

Un hotel en San Fiz ou pór en valor o espazo humanizado das ribeiras e construír futuro?

Vista das ribeiras de San Fiz (xaneiro de 2021). Foto: arquivo Por Chantada,

Desde Por Chantada apresentamos alegacións ao Plano de Ordenación do Medio Físico de San Fiz de Asma, doravante POMF, diante da Consellaría competente para defender o ben común e os intereses da viciñanza, toda vez que o Concello de Chantada non abriu á participación e mesmo non consultou coa oposición o documento-proposta. De feito, o goberno de Manuel Varela limitouse a unha única e breve alegación formulada polo técnico municipal de urbanismo. Novamente, piloto automático e opacidade.

No tocante ás prometidas inversións, o POMF detalla moi pouco as propostas de actuación e adíaas a unha hipotética segunda fase. Para alén diso, algunhas actuacións teñen, na súa formulación actual, unha viabilidade e utilidade moi limitada ou vólcanse exclusivamente para o turismo esquecendo o sector primario que lle dá vida a esta paisaxe, a pesar de que declarativamente se di o contrario. Así, por pór só un exemplo, fronte a un uso hosteleiro na área dos Cipreses, ao que se destinarían 5 millóns de euros, propomos a recuperación do patrimonio natural e etnográfico dos Cachóns do Asma. Tamén facemos fincapé en que a PAC debe dar resposta ás necesidades dos nosos viticultores que, xunto ás adegas existentes, deben ser a columna vertebral de calquera estratexia de futuro para a zona.

Aausencia total de participación das comunidades afectadas, a exclusión xa que logo dos indíxenas que manteñen e conforman a paisaxe e o ámbito que se quer protexer, agudiza a sensación de que os diferentes instrumentos aplicados sobre a Ribeira Sacra (BIC, Reserva de Biosfera, POMF…) son exóxenos e impostos de arriba a abaixo, sen consentimento explícito da poboación das áreas afectadas nen participación real. É máis, a desinformación e falta de coñecemento sobre o expediente e as súas consecuencias é íntegro no caso destas.

Desde a década de oitenta temos diversos exemplos que veñen demostrando como este proceder cria figuras de protección que rematan por elaborar decorados artificiais ou marcas territoriais en canto as comunidades locais foron explulsas. Neste sentido, un POMF, un BIC ou calquera outra figura de protección nen é boa nen má per se, o problema é o uso que se lle dá aos instrumentos, a súa concepción e implementación e a propaganda que agocha unha participación real e fluxos de información efectivos.

Daquela, esta panoplia declarativo-lexilativa, alentada no fundo só como requerimentos para atinxir a declaración de Patrimonio da Humanidade como “política estrela” de configuración dunha marca territorial, contrasta coa ausencia de inversións reais efectivas no territorio, coa falta de aposta polo tecido produtivo primario –auténtico baluarte e salvagarda da poboación e das formas tradicionais de humanizar o territorio– ou con continuadas agresións ao patrimonio sen consecuencias, por citarmos algúns exemplos recentes (posteriores a 2015):

• venda pola Internet de pedra do mosteiro de San Salvador de Asma (BIC);

• cimentación do camiño lousado de Belesar por parte do Concello de Chantada, tiradas hai séculos as lousas do río pola viciñanza;

• formigoneado da base do Cruceiro de Muradelle por parte do Concello de Chantada;

• desfiguración polo bispado da capela da Virxe do Faro;

• derribo de hórreos;

• degradación con maquinaria pesada da mámoas do monte Cabeza do Faro…

 

Consulta o documento íntegro coas nosas alegacións premendo na ligazón (PDF de 22 páxinas):

https://drive.google.com/file/d/1daiL3OTwd8_ZKDc-C8aowrSYoawhQoRV/view?usp=sharing

Moción para a adopción de medidas de apoio ao campo galego

Para accederes á MOCIÓN PARA A ADOPCIÓN DE MEDIDAS DE APOIO AO CAMPO GALEGO preme na seguinte ligazón:

mocion-para-a-adopcion-de-medidas-de-apoio-ao-campo-galego

 

Como curiosidade pomos unha moción apresentada pola dereita local no ano 2009, daquela na oposición:

Moción apresentada polo PP no ano 2009, por aquel entón estaba na oposición tanto en Chantada como na Xunta.

 

Información de interese sobre fitosanitarios

Desde Por Chantada-CUP organizaremos un acto informativo o vindeiro 29 de xullo sobre a nova lexislación sobre fitosanitarios así como unha visión sobre a influencia e efectos do lobbing das transnacionais dos pesticidas sobre as nosas vidas ou os efectos destes produtos na nosa saúde. Será unha palestra aberta a todo aquel que desexe achegarse e onde poderedes formular as vosas inquedanzas. Conteremos con Vítor Álvarez Árias funcionario de Medio Rural e, antes de máis, activista político envolvido sempre coa causa e nas loitas da esquerda galega emancipadora.

En consecuencia, parécenos interesante oferecer algunha información previa que poda servir para ir aclarando determinadas cuestións que afectan aos usuarios de produtos fitosanitarios e nomeadamente no relativo á Inspección de equipos de apliación de fitosanitarios (ITEAF) ou máis coñecida como a “ITV das sulfatadoras”.

As equipas de aplicación de produtos fitosanitarios, a partires de agora, deberán ser inspeccionadas tal e como estabelece a Xunta e, dependendo da equipa, o seu custo oscilará entre os 75 e os 85€ . A data límite para facelo é o 26 de novembro de 2016. A lexislación aplicábel é o Decreto 60/2014, de 15 de maio, polo que se regulan as inspeccións periódicas das equipas de aplicación de produtos fitosanitarios e se crea o Comité Fitosanitario Galego e o Real Decreto 1702/2011, de 18 de novembro, de inspeccións periódicas das equipas de aplicación de produtos fitosanitarios.

No entanto, debemos ter claro que non afecta a calquera dispositivo dos que se emprega para dar produtos fitosanitarios. Así pois, non será necesario que unha sulfatadora tradicional pase a ITEAF en ningún caso (xa que non ten unha capacidade superior aos 100 litros). Aqueles dispositivos que si atinxe a nova lexislación antes de pasar a ITEAF deberán inscribirse no Rexistro Oficial de Maquinaria Agrícola (ROMA).

Porén, diferente é o caso doutros dispositivos que si a deberán pasar. Por exmeplo, as equipas móbiles de aplicación de produtos fitosanitarios de uso agrario e non agrario como os pulverizadores hidráulicos, os pulverizadores hidroneumáticos, os pulverizadores neumáticos, os pulverizadores centrífugos ou os espolvoreadores. A maiores, tamén lle afecta ás equipas de aplicación montadas a borde de aeronaves, as equipas instaladas no interior de invernadorios e outros locais fechados ou os pulverizadores de arrastre manual con depósito maior de 100 litros.

Canto á periodicidade das inspeccións nas equipas novas será dentro dos 5 anos a partir da súa adquisición e a partires daí unha vez cada lustro a non ser no caso de titulares prioritarios que será cada 3 anos (asociacións, empresas de servizos agrarios, cooperativas ou comunidades de bens con máis de dez produtores).

Antes de levardes os vosos dispositvos a pasar a ITEAF debedes levar a cabo unha serie de operacións con carácter previo:

1.- Ter correctamente regularizada a equipa, coa documentación da máquina e o número correspondente do ROMA.

2.- O traballador que emprega habitualmente a equipa debe estar presente na inspección.

3.- O dispositivo deberá ir totalmente limpo de tratamentos polo que se debe desmontar preivamente limpando todas as saídas e filtros para que non teña restos de produtos. Comprobar que non haxa obstruccións ou pezas desgastadas.

4.- Arranxar calquera defecto ou disfunción que, con anterioridade á inspección, se teña detectado.

5.- O depósito deberá ir con auga en 3/4 partes da súa capacidade e, preferentemente, accionado polo tractor co que habitualmente se emprega.