Cantos máis casos, menos médicos. Exiximos para o centro de saúde de Chantada o 100% do persoal.

Chantada, 3 de decembro de 2021. Con rogo de difusión.

Co Nadal ás portas e con vaga de gripes e pandemía de COVID-19 (37 novos casos nos últimos 14 días, dos que 22 se produciron na última semana) desde Por Chantada volvemos denunciar o colapso do centro de saúde de Chantada. A situación actual é totalmente dantesca con cartaces por todo o centro que indican «Consulta pechada. Só se atenderán urxencias» xusto en plena onda da COVID-19 e con varios gromos en Chantada.

A pesar do dramático da situación no pleno ordinario da Corporación, que se celebrou onte 2 de decembro, o alcalde afirmou que el visitara o centro de saúde e que practicamente non había pacientes, xustificando así o maltrato que o PP está dispensando ao rural en xeral e a Chantada en particular.

Viciñanza que tiña cita hoxe, 3 de decembro, vena mudada para o día 20 de novembro e sen garantías de que poidan ser atendidos e aínda grazas que está a pediatra. No entanto, o Sergas segue dando citas por Internet a pesar de que non cobren baixas nen mandan medios. Hai médicos en Chantada con cupos de 1600 pacientes cando 70% dos mesmos teñen máis de 70 anos, polo que 1.000 pacientes no rural equivalen a máis de 4.000 nunha cidade en carga e intensidade de traballo.

Con máis de 8.000 habitantes no Concello, dous médicos deben atender todos os cupos e desde a xerencia de Lugo non se envía persoal polo que co persoal existente, 2 facultativos e 4 traballadores da enfermaría, só se dan atendido urxencias e se hai que ir atender unha urxencia ou atención domiciliaria fica un único médico para todo o centro de saúde. A situación é tan calamitosa que non se poden dar altas médicas nin renovar partes de baixa, apenas se lles expide un papel por parte dos administrativos do centro debendo.

Así as cousas, cidadáns que tiñan cita estes días deberán agardar máis dunha semana para seren atendidos, no mellor dos casos, e as citas que se obtiveron hoxe adíanse xa até os días 13 e 14, no caso de que desen atendido.

Por súa vez, os rastreadores remiten para os resultados das PCR ao médico de cabeceira polo que PCRs feitas o día 1 terán que agardar até o día 14 para saber o resultado, mentres se dan altas aos 10 días sen PCR de confirmación para camuflar dados co que se arriscan a propagar máis a pandemía.

Na secuencia do exposto, é materialmente imposíbel dispensar unha atención minimamente axeitada en plena vaga da COVID-19. Dous médicos non poden atender a máis de 90 pacientes cada un día após día ou empatando quendas de urxencias coas mañás reiteradamente. En novembro, os facultativos atenderon entre 60 e 90 pacientes ao día, o que equivale a dedicar apenas uns segundos por cada paciente, unha degradación absoluta e total da atención médica e da sanidade pública.

A propaganda da Xunta é que non hai médicos ou pediatras e mesmo pretenden desviar a responsabilidade desta suposta carencia cara ao Goberno central. O PP oculta que o Sergas só está ofrecendo medias xornadas de luns a venres, para aforrar o soldo e a seguranza social da fin de semana, que, aínda por riba, na práctica son xornadas completas de 9 a 13 horas con 60 pacientes e, moitas veces, empatando coas urxencias (noite). Nestas condicións, con contratos a días, enganosos e precarios; os facultativos foxen deles coma da peste. Que calidade pode reunir a atención médica dispensada nestas paupérrimas condicións? Que falta total de Humanidade e empatía pode levar a xerentes e responsábeis políticos a actuares deste xeito?

Desde Por Chantada denunciamos a deliberada degradación da sanidade que practican Feijoo e o PP. Anuncian obras para centros que non terán médicos mentres non manteñen en condicións os actuais. As obras non salvan vidas, mais son máis lucrativas ca os soldos dos profesionais. Os dados e a realidade que todas e todos vivemos non se oculta con propaganda e titulares nos medios de comunicación. Fronte ás agresións á sanidade e á regresión dos nosos direitos animamos a todas as persoas afectadas a denunciar interpondo reclamacións nalgún dos seguintes lugares:

• no portelo único do Concello de Chantada mediante o modelo que anexamos: Folla_de_Reclamacións;

• en atención ao paciente (hospital de Monforte);

• electronicamente: https://contacte.sergas.gal/QUEREW/main.do (require Chave 365 ou certificado dixital).

Grupo de traballo de saúde pública de Por Chantada – Candidatura de Unidade Popular.

O goberno local incumpre a súa obriga de adecuar as licenzas da hostalería á Lei de Espectáculos.

 

Chantada, 2 de setembro de 2021.

O poeta e integrante de Por Chantada, Rafa Lobelle, recitando nun recente recital, que se desenvolveu nas xornadas CULTURMAR, que organizou na semana das festas patronais a Cafetaría Mar de Chantada.

 

O próximo 14 de outubro vence o prazo da Xunta da Galiza para que os Concellos adapten as licenzas dos negocios hostaleiros ao Catálogo de Espectáculos Públicos.

O goberno de Manuel Varela incumpre as súas obrigas: nen se molestou en dous anos en informar aos negocios afectados, nen cumpre as súas obrigas máis básicas, mesmo as que derivan de ordes da Xunta da Galiza. Manuel Varela revela unha e outra vez a súa incompetencia en detrimento dun sector xa duramente castigado pola pandemía como é a hostalaría.

No inicio de 2018 entrou en vigor a Lei 10/2017, do 27 de decembro, de espectáculos públicos e actividades recreativas da Galiza, que, fora duramente criticada por varios dos colectivos afectados, desde as comisións de festas e festivais até ás salas de concertos e locais hostaleiros que complementan a súa actividade con programación cultural, aos que aquela lei condenaba ao feche.

O 14 de outubro de 2019, o DOG publicou o Decreto 124/2019, do 5 de setembro, polo que se aproba o Catálogo de espectáculos públicos, actividades recreativas e estabelecementos abertos ao público da Comunidade Autónoma de Galiza e se establecen determinadas disposicións xerais de aplicación na materia. O seu contido afecta ás comisións de festas e aos locais hostaleiros e corrixía parcialmente os aspectos máis lesivos da lei para o que unha das pancas esenciais é o obriga para os concellos de realizaren a adaptación das licenzas municipais a esta lei nun prazo de dous anos desde o 14 de outubro de 2019.

No tocante aos horarios, desenvolveuse o decreto mediante nunha orde, á que Por Chantada alegou en setembro de 2019 no período de exposición pública¹. Coma sempre o Concello de Chantada nen estaba nen se esperaba a pesar de contar con máis medios e dedicacións exclusivas. O senador co seu habitual piloto automático leva dous anos mirando para o ar e o prazo remata de xeito inminente. Por Chantada exíxelle traballo e adicación para seren resolutivos en diálogo coa hostalaría.

Este crónico desleixo fai que Chantada vaia esmorecendo e atinxe directamente tamén á economía local. Nesta ocasión, as consecuencias impactarían na cultura e na hostalaría precisamente os sectores máis castigados pola pandemía.

Desde a candidatura viciñal Por Chantada, á vista de que os prazos postos pola Xunta de Galicia están preto de esgotarse e de que o noso goberno non fai nada para regularizar a situación, apresentamos por rexistro escrito recordándolle a Manuel Lorenzo Varela as obrigas marcadas polo decreto do goberno autonómico, e solicitándolle que de xeito inmediato se dirixa aos negocios afectados, informándoos da Lei de Espectáculos e a lexislación que a desenvolve.

O Concello debe outorgarlle ás persoas afectadas un prazo para realizar os tramites pertinentes, e antes de que venza o tempo estabelecido pola Xunta, a Xunta de Goberno Local, que é o órgano neste caso competente, debe aprobar as licenzas axeitadas á lei.

Tamén aproveitamos para lembrarlle ao Goberno local que segue sen elaborar as bases para repartir os 50.000€ orzamentados para axudas COVID-19 en bonos, tan necesarios para as persoas máis carenciadas pola actual crise.

O desleixo do goberno local cara a hostalería e o comercio do noso concello é cada día máis patente. O descontento dos comerciantes e hostaleiros, tamén. Pola nosa banda, Por Chantada seguirá ao servizo da viciñanza, insistindo na necesidade de crear liñas eficaces de apoio e impulso de campañas de promoción do comercio e o consumo no ámbito local.

Agardamos que, novamente grazas ao traballo e constancia de Por Chantada, o Leviatán local saia do seu sono profundo e a situación se resolva en favor dos referentes culturais do noso concello.

 

POR CHANTADA – CANDIDATURA DE UNIDADE POPULAR

 

 

1“Suxestións de mellora de Por Chantada ao proxecto de orde para regular horarios de abertura e feche dos estabelecementos na Galiza.” in Por Chantada. Dispoñíbel en

https://porchantada.wordpress.com/2019/09/24/suxestions-de-mellora-de-por-chantada-ao-proxecto-de-orde-para-regular-horarios-de-abertura-e-feche-dos-estabelecementos-na-galiza/ (última consulta 7/08/2021).

Moción de POR CHANTADA-CUP para a incorporación do Pazo de Meirás ao patrimonio público e a salvagarda da memoria histórica

 

No día de hoxe, sábado do folión de carros, impulsamos desde Por Chantada-CUP unha moción para que se incorpore o Pazo de Meirás ao patrimonio público e se garde a memoria histórica. A tal efeito respaldamos o acordo adotado polo Pleno da Corporación do Concello de Sada que foi tamén asumido pola Deputación da Cruña e outros consistorios.

Consulta aquí a moción en pdf: Moción de Por Chantada-CUP para a incorporación do Pazo de Meirás ao patrimonio público e a salvagarda da memoria histórica

 

#SomosAlternativa #CUPChantada

ALEGACIÓNS AO ANTEPROXECTO DE LEI POLO QUE SE MODIFICA A LEI 8/2008 DE SAÚDE DA GALIZA

 

No día da romaría do Faro desde Por Chantada-CUP apresentamos alegacións ao anteproxecto de lei polo que se mofifica a Lei 8/2008, do 10 de xullo, de saúde da Galiza. Preocúpanos que afonda na ofensiva de socializar as perdas e privatizar os beneficios, degradar a sanidade pública e incrementar a condición periférica de Chantada e da Ribeira Sacra ao tempo que acelera a merma dos servizos sanitarios, facendo desaparecer a área sanitaria de Lemos.

Máis información no pdf coas nosas alegacións: alegacións anteproxecto lei supresión área sanitaria Monforte 

Outra documentación de interese: SA_lei_modificacion_lei saude_galicia_gal

Animámosvos a apresentardes as vosas alegacións (podedes facer vosas as nosas suxestións ou moficalas) premendo aquí (abrirase unha nova páxina).

#SomosAlternativa #CUPChantada

Crónica do pleno ordinario do 14 de xullo de 2017

O pleno non comezou até as 20:06 xa que desde Inta fixeron tempo para que chegasen os seus concelleiros. Asistiu toda a Corporación, agás Manuel Diéguez (Inta) e a interventora, aínda habendo asuntos de índole económica. Tamén asistiu o funcionario Segundo Navaza. Canto a cidadás que asistisen só tres persoas se achegaron na tónica xeral da lexislatura, polo que semella que existe un fondo desisterese polo Pleno e a política local por parte da maioría da sociedade chantadina.

Alegacións da CUP ao anteproxecto de transporte para a comarca de Chantada

 

Por Chantada-CUP apresentou no día de hoxe (08/06/2017) alegacións ao Plano de transportes da Galiza, nomeadamente a aqueles anteproxectos que atinxen a nosa comarca (códigos XG548 “Lalín-Monforte-Lugo, con anexos” e XG549 “Chantada-Carballedo, con anexos”) e que consideramos que pecan de improvisación após o fallo do Tribunal Supremo de marzo de 2016, que anulou 129 concesións de transporte público por estrada.

Así as cousas, estas propostas non nacen dun período de exposición e participación real que mapee o rural da nosa comarca e garanta o direito e as necesidades sociais dos habitantes do rual, senón que unicamente fan primar criterios economicistas que só farán empiorar a situación e contribuír para o avance do deserto verde. Entre 2006 e 2016 Chantada perdeu 8’8% da súa poboación a pesar de ser cabeceira comarcal, pasando de 9.249 habitantes a 8.431, se ben a cifra real de residentes habituais é moi inferior. No caso de Taboada a caída demográfica é de 19%, pasando de 3.614 habitantes a tan só 2.928. Por último, en Carballedo, para o mesmo período, a mingua é de 22,2% (de 2.929 habitantes en 2006 a 2.280 en 2016). Un verdadeiro inverno demográfico cunha caída comarcal de 14% da poboación.

Por todo isto, nas nosas alegacións apostamos por garantir o direito ao transporte público de todos os cidadáns, non só os das grandes urbes, impulsando fórmulas reais de transporte baixo demanda que demandan a implicación de todas as administracións e unha participación seria e en condicións do tecido cívico e social na elaboración dun plano integral de transportes para a Galiza.

En consecuencia, valoramos urxente atender ao conxunto da comarca xa que estas liñas parciais asociadas ao transporte escolar non solucionan o centro da cuestión: o direito dos cidadáns do rural ao transporte público e a un transporte público que atenta ás súas necesidades. Así, en canto, os nosos políticos se desfán en prometer o Tren de Alta Velocidade(TAV) o rural esmorece sen un servizo de transporte e as conexións entre Chantada coas 7 cidades galegas e con Monforte son cada vez máis fracas e deficientes e o Goberno de Inta nen sequera foi capaz de contestar ao inquérito da Xunta: ir de Chantada a Vigo supón, por exemplo, por volta de 6 horas con transbordo en Ourense, ou sexa, chégase antes a
Lisboa ou a Madrid.

Rematamos cun parágrafo das nosas alegacións:

Por dicilo todo, isto é un efeito máis da corrupción sistémica engarzada no aparato xurídico-político do Reino de España, onde unha oligarquía vive de depredar os recursos públicos. Non é unha afirmación no ar, senón que o emprego da obra pública como fonte de negocio e lucro é a única explicación ao estado de cousas actual onde en canto a maior parte do territorio non ten servizos de transporte dignos o Reino de España é o estado europeo con máis quilómetros de autovías e autoestradas (máis de 20% do total da UE) e só 2 estados no mundo teñen máis quilómetros totais: EUA e China, iso si con entre 7 e 30 veces máis poboación. Igualmente, somos o primeiro estado europeo e o segundo do mundo con máis quilómetros totais de alta velocidade ferroviaria, aínda que só con 20% e con 7% dos viaxeiros que teñen Franza e Xapón que nos seguen de cerca. Por outras palabras, durante décadas en vez de vertebrar territorialmente o Estado e a nación galega os poderes públicos gastaron billóns de euros en infraestruturas inútiles (aeroporto de Castellón), infrautilizadas, privatizadas… socializando as perdas (autoestradas de Madrid) e privatizando os beneficios (AP-9 amortizada hai longo tempo). E mentres Holanda, Bélxica ou os estados desenvolvidos realmente vertebrados territorialmente teñen un servizo ferroviario de proximidade extraordinario o Estado español desmantela na Galiza as proximidades e o tren segue sen chegar as principais vilas e cabeceiras comarcais do país.

 

#SomosAlternativa #CUPChantada

PDF coas alegacións aquí: Alegacións ao Plano de transporte público de Galiza

 

 

Crónica do pleno ordinario do 08/05/2017

 

O pleno comezou ás 20:08 horas coa presenza dos 13 concelleiros do Pleno mais a secretaria e a interventora municipais. Foi un pleno bronco onde se evidenciou máis unha vez a total falta de repeito pola lei e polo debate democrático por parte de Inta, quen leva meses baleirando o pleno de calquera contido en canto o Concello segue sen iniciativa e na parálise.

MOCIÓN PARA IMPULSAR UN ESTUDO SOBRE A INCIDENCIA DO CANCRO NO CONCELLO DE CHANTADA E A ADOPCIÓN DE MEDIDAS PREVENTIVAS FRONTE ESTA DOENZA

 

Moción íntegra en pdf:

Moción de Por Chantada-CUP para impulsar un estudo sobre a incidencia do cancro no Concello de Chantada e a adopción de medidas preventivas fronte esta doenza.

#SomosAlternativa #CUPChantada

Por Chantada-CUP apresentará 3 mocións no pleno ordinario de xaneiro (23/01/2017)

ORDE DO DÍA DEFINITIVA: convocatoria-orde-do-dia-definitiva

O vindeiro 23 de xaneiro celébrase a sesión ordinaria do pleno de Chantada, atrasada a petición de Inta xa que debera celebrarse o día 9 de xaneiro, mais alegaban certar coas vacacións. A pesar do notábel atraso na convocatoria das comisións informativas, que se mudaron de día sen previo aviso, o Goberno non trasladou ningún asunto para ser tratado e continúa a procurar subterfuxios de diversa índole para dificultar o labor de oposición de Por Chantada-CUP, cuxo voceiro está actualmente traballando no estranxeiro ao igual que moita da nosa mocidade emigrada que pouco lle importa ao indolente Desgoberno municipal.

Desde Por Chantada-CUP trasladamos 3 mocións ao vindeiro pleno que explicamos suscintamente e que poden consultarse en PDF nesta mesma entrada. Para comezar dicir que están pensadas tamén no marco da aprobación do novo marco orzamentar para este 2017 que, como é habitual, chegará tamén con notábel atraso e fóra de prazo.

1.- Moción de Por Chantada-CUP para a mellora e ampliación da biblioteca municipal. Con esta moción, que recolle peticións que nos trasladaron usuarios e mocidade organizada do noso concello, queremos sentar as bases para a construción dun espazo digno para a consulta e o estudo, a recuperación do arquivo municipal e a reorganización e racionalización da Casa da Cultura, etc.

2.- Moción para impulsar a creacion dunha mesa local de coordinacion interinstitucional fronte a violencia de xenero . Con esta moción tentamos achegar unha proposta concreta, xa en andamento nalgunha comarca galega, para o combate da violencia doméstica e da lacra da violencia de xénero xa que ano a ano vemos que os minutos de silencio e as declaracións institucionais de pouco serven sen medios e disposicións concretas.

3.- Moción de Por Chantada-CUP para a restitución do acceso universal ao sistema estatal de saude e plano de choque contra a exclusion no concello de Chantada. Con esta proposta visamos defender a universalidade dos servizos públicos, nomeadamente da sanidade, trasladando a nosa visión local a outras instancias e, ao tempo, comprometéndonos cun humilde e perfectamente asumíbel plano de choque local contra a crecente exclusión social (o Reino de España é o estado europeu onde máis inzou a desigualdade desde 2008 e o sul de Lugo é o territorio coas taxas de exclusión social máis elevadas da Galiza).

A orde do día foi modificada grazas a nosa petición de que inclúa a rendición de contas da suposta “urxencia” do pleno extraordinario de decembro que, finalmente, ficou en nada.

Tamén trasladaremos numerosas cuestións, preguntas e rogos como vén sendo habitual e ficamos á vosa disposición para calquera suxerencia, pois entre tod@s construímos Chantada.

#SomosAlternativa #CUPChantada

https://www.facebook.com/PorChantada/?fref=ts  

Por Chantada lamenta a politización do camiño de inverno en campaña electoral

Desde a candidatura de unidade popular Por Chantada lamentamos profundamente o incumprimento da lexislación electoral por parte de Inta e do PP, algo absolutamente execrábel e que nos devolve ao tempo do caciquismo máis cinsento. É intolerábel que se fagan inauguración en campaña electoral, máxime cando Monforte de Lemos e Chantada comparten secretario tendo advertido este nun informe que:

A data escollida, o 17 de setembro, está dentro da campaña das eleccións ao Parlamento de Galiza e hai restricións da normativa electoral para este tipo de actos se participan representantes das administracións públicas.

Nin ao PP nin a Manuel Varela lle importou este informe como semella que non lles interesa a lei, demostrando cos seus feitos día si e día tamén que están por riba dela.

Igualmente, é lamentábel que unha asociación cun fin tan nobre como promover o camiño de inverno se preste a esta burda manipulación política, tomando partido así precisamente polos mesmos políticos que, co seu desleixo crónico, nin son capaces de conservar e sinalar axeitadamente o camiño ou que seguen permitindo que o trazado histórico e a variante por Oseira continúen sendo invisibilizadas.