Por Chantada califica de bochornosas as declaracións do alcalde sobre o centro de saúde.

•   En vez de perder o tempo vendendo “xestións” inexistentes e insultando a intelixencia da viciñanza debería saír nos xornais exixindo da Xunta unha atención sanitaria pública de calidade, aínda que el non sexa usuario da mesma.

• Para Por Chantada é moi grave que o alcalde use a páxina e as redes sociais para facer política de partido.

Chantada leva tempo sufrindo un progresivo empeoramento da situación da atención primaria que chegou a unha situación aguda e insostíbel nos últimos meses. Por iso, a sociedade organizouse na plataforma Chantada Quere Sanidade e convocou mobilizacións, para alén de recoller sinaturas e outras accións, mentres o alcalde e o goberno municipais se mantiveron de perfil. Vender como “xestións” unha moción no mes de setembro ou unha chamada telefónica é un insulto á intelixencia.

 

Agora, cando o clamor social é macizo e se lles pide explicacións, saen cun comunicado infame onde a manipulación e a mentira se dan a mao. Afirma o alcalde que “isto pasa nos concellos de todas as cores políticas, non só nos do PP” como se non soubésemos que as competencias sobre o centro de saúde de Chantada e o hospital comarcal son da Xunta, onde goberna o PP con maioría absoluta e que leva anos recortando en sanidade e facéndoa funcionar mal para favorecer a sanidade privada. Cando os servizos esenciais e mesmo a saúde da viciñanza están en xogo o mal de moitos é consolo de tontos e non vale eludir responsabilidades. O alcalde debería actuar enerxicamente enfrontándose ao seu partido, mais nada se fixo e xustifica nunha moción da oposición ou nunha chamada de teléfono que se fixeron “xestións”. Para iso non cómpre un alcalde.

 

Foto: Chantada Quere Sanidade.

 

Para o noso grupo é de extrema gravidade que se empregue a páxina e as redes da institución municipal para facer propaganda de partido e, aínda por riba acusando aos demais do que é inhenerente á súa forma de estar en política: a mentira. Non tiveron espazo para informar das concentracións ou das accións da viciñanza que loita pola sanidade, mais si agora para difundir un comunicado en chave totalmente partidista e afastada completamente do perfil institucional.

 

É unha vergoña que o alcalde non se interesara polas concentraciós e que mesmo se negara a asinar en apoio das demandas da plataforma, mais si teña tempo agora para mentir e vender xestións onde só hai espaventos. Se quere facer xestións teno tan fácil como en vez de atacar as súas viciñas e viciños chamándolles mentirosos e mentirosas, cando están pondo tempo e cartos para loitar polo que é un direito constitucional, sinale os verdadeiros responsábeis na Xunta e exixa unha atención sanitaria digna e de calidade para a maioría social que imos á sanidade pública, aínda que el non sexa utente da mesma e prefira ir á privada.

Cantos máis casos, menos médicos. Exiximos para o centro de saúde de Chantada o 100% do persoal.

Chantada, 3 de decembro de 2021. Con rogo de difusión.

Co Nadal ás portas e con vaga de gripes e pandemía de COVID-19 (37 novos casos nos últimos 14 días, dos que 22 se produciron na última semana) desde Por Chantada volvemos denunciar o colapso do centro de saúde de Chantada. A situación actual é totalmente dantesca con cartaces por todo o centro que indican «Consulta pechada. Só se atenderán urxencias» xusto en plena onda da COVID-19 e con varios gromos en Chantada.

A pesar do dramático da situación no pleno ordinario da Corporación, que se celebrou onte 2 de decembro, o alcalde afirmou que el visitara o centro de saúde e que practicamente non había pacientes, xustificando así o maltrato que o PP está dispensando ao rural en xeral e a Chantada en particular.

Viciñanza que tiña cita hoxe, 3 de decembro, vena mudada para o día 20 de novembro e sen garantías de que poidan ser atendidos e aínda grazas que está a pediatra. No entanto, o Sergas segue dando citas por Internet a pesar de que non cobren baixas nen mandan medios. Hai médicos en Chantada con cupos de 1600 pacientes cando 70% dos mesmos teñen máis de 70 anos, polo que 1.000 pacientes no rural equivalen a máis de 4.000 nunha cidade en carga e intensidade de traballo.

Con máis de 8.000 habitantes no Concello, dous médicos deben atender todos os cupos e desde a xerencia de Lugo non se envía persoal polo que co persoal existente, 2 facultativos e 4 traballadores da enfermaría, só se dan atendido urxencias e se hai que ir atender unha urxencia ou atención domiciliaria fica un único médico para todo o centro de saúde. A situación é tan calamitosa que non se poden dar altas médicas nin renovar partes de baixa, apenas se lles expide un papel por parte dos administrativos do centro debendo.

Así as cousas, cidadáns que tiñan cita estes días deberán agardar máis dunha semana para seren atendidos, no mellor dos casos, e as citas que se obtiveron hoxe adíanse xa até os días 13 e 14, no caso de que desen atendido.

Por súa vez, os rastreadores remiten para os resultados das PCR ao médico de cabeceira polo que PCRs feitas o día 1 terán que agardar até o día 14 para saber o resultado, mentres se dan altas aos 10 días sen PCR de confirmación para camuflar dados co que se arriscan a propagar máis a pandemía.

Na secuencia do exposto, é materialmente imposíbel dispensar unha atención minimamente axeitada en plena vaga da COVID-19. Dous médicos non poden atender a máis de 90 pacientes cada un día após día ou empatando quendas de urxencias coas mañás reiteradamente. En novembro, os facultativos atenderon entre 60 e 90 pacientes ao día, o que equivale a dedicar apenas uns segundos por cada paciente, unha degradación absoluta e total da atención médica e da sanidade pública.

A propaganda da Xunta é que non hai médicos ou pediatras e mesmo pretenden desviar a responsabilidade desta suposta carencia cara ao Goberno central. O PP oculta que o Sergas só está ofrecendo medias xornadas de luns a venres, para aforrar o soldo e a seguranza social da fin de semana, que, aínda por riba, na práctica son xornadas completas de 9 a 13 horas con 60 pacientes e, moitas veces, empatando coas urxencias (noite). Nestas condicións, con contratos a días, enganosos e precarios; os facultativos foxen deles coma da peste. Que calidade pode reunir a atención médica dispensada nestas paupérrimas condicións? Que falta total de Humanidade e empatía pode levar a xerentes e responsábeis políticos a actuares deste xeito?

Desde Por Chantada denunciamos a deliberada degradación da sanidade que practican Feijoo e o PP. Anuncian obras para centros que non terán médicos mentres non manteñen en condicións os actuais. As obras non salvan vidas, mais son máis lucrativas ca os soldos dos profesionais. Os dados e a realidade que todas e todos vivemos non se oculta con propaganda e titulares nos medios de comunicación. Fronte ás agresións á sanidade e á regresión dos nosos direitos animamos a todas as persoas afectadas a denunciar interpondo reclamacións nalgún dos seguintes lugares:

• no portelo único do Concello de Chantada mediante o modelo que anexamos: Folla_de_Reclamacións;

• en atención ao paciente (hospital de Monforte);

• electronicamente: https://contacte.sergas.gal/QUEREW/main.do (require Chave 365 ou certificado dixital).

Grupo de traballo de saúde pública de Por Chantada – Candidatura de Unidade Popular.

Moción de Por Chantada para o reforzo da sanidade pública, nomeadamente na nosa área sanitaria.

 

A situación sanitaria derivada da pandemía da COVID19 é cada vez máis preocupante e desde marzo non se reforzou a sanidade polo que a sombra de novas restricións é unha evidencia nesta segunda vaga, que semella vai castigar con maior virulencia a nosa comarca cá primeira. Por iso, desde Por Chantada levaremos ao próximo pleno unha Moción para o reforzo da sanidade pública, nomeadamente na nosa área sanitaria, é dicir, no sul de Lugo. Por todo isto, imos seguir traballando en alternativas e demandando que fagamos Política, en maiúscula, e adaptada ao novo mundo que nos tocou viver, xa que nada voltará ser igual.

 

Que pedimos?

👉 Solicitar á Xunta da Galiza que incremente o orzamento sanitario e que garanta que os fondos estatais se destinen á sanidade e á educación pública na Galiza. Nomeadamente, o sul de Lugo precisa un aumento dos recursos para atención primaria e o hospital comarcal.

👉 Que se poña fin ás restricións de acceso aos centros de Saúde, que están limitando as actividades de promoción, prevención e recuperación da saúde da poboación. A atención telefónica debe ser un complemento á atención presencial e non a única opción para a poboación.

👉 Incrementar o persoal dos equipos de Atención Primaria, garantíndolles unhas condicións de traballo dignas, un equipamento adecuado e o libre acceso a probas diagnósticas.

👉 Trasladar á Xunta a esixencia de que cese a política de desmantelamento e feche de servizos do hospital comarcal de Monforte, dotándoo do persoal necesario en cada categoría e contratando as/os especialistas necesarios. Concretamente:
• unha praza de especialista en neuroloxía;
• unha praza de especialista dixestivo;
• unha praza de especialista en cardioloxía;
• unha praza de pediatra en atención primaria para toda a zona, que xa era precisa sen a COVID-19.

👉 Trasladar á Xunta a esixencia de que recupere a área sanitaria de Monforte, con capacidade de xestión.

👉 Trasladar á Xunta a esixencia de que se publiquen as listaxes de espera ocultas – non estruturais – e se acometa un plano de redución das listaxes de agarda e tempos de demora das consultas de atención especializada, probas diagnósticas, cirurxía e procedementos terapéuticos no Hospital de Monforte.

👉 Acabar coa parálise dos servizos hospitalarios, para o que propoñemos crear circuítos separados para persoas coa COVID-19 e con outras patoloxías e abrir os centros pola tarde para acabar o máis pronto posíbel coa enorme listaxe de agarda xerada durante a pandemia.

👉 Dar participación aos concellos e aos representantes da poboación na loita contra a COVID nas áreas sanitarias.

👉 Desenvolver os instrumentos de participación social na sanidade, poñendo en marcha o Consello de Saúde da Galiza e os Consellos de Saúde de Área Sanitaria.

👉 Proporcionar información real e actualizada, das persoas afectadas en cada localidade, para que os Concellos e a poboación, coñezan a transcendencia da pandemía e colaboren activa e responsabelmente na súa solución.

👉 Constituír unha Comisión de coordinación sanitaria comarcal con representantes dos PAC e dos Concellos de Chantada, Carballedo e Taboada. As súas funcións serían partillar informacións, seguir a incidencia comarcal da COVID-19 e propor medidas e proposta para aplicar desde o ámbito municipal na comarca.

 

Podes consultar aquí o texto íntegro da moción en formato PDF: Moción de Por Chantada para o reforzo da sanidade pública, nomeadamente na nosa área sanitaria.

 

#construírfuturo #mellorarChantada #opartidodaxente

 

Rendición de contas das actuacións de Por Chantada durante a crise do COVID-19 [última actualización 07/06/2020]

 

 

 

Na presente entrada da nosa bitácora iremos rendendo contas das principais actuacións desenvolvidas desde o noso grupo municipal en relación coa crise sanitaria derivada do COVID-19. Neste sentido, a nosa actuación caracterízase por brindar a nosa total disposición a colaborar co Goberno municipal para a mellor resolución da crise mediante a achega de propostas.

1. Propostas de Interior Galego Vivo ante a crise do coronavirus (13/03/2020).
2. Interior Galego Vivo: FAQ Ninguén é unha illa. Preguntas e respostas para o mundo rural perante a crise do coronavirus (15/03/2020).
3. Propostas de Por Chantada-CUP para actuación desde o Goberno municipal perante a emerxencia sanitaria derivada do COVID-19. (21/03/2020)
4. Proposta de protocolo para o SAF no Concello de Chantada a aplicar durante a crise do COVID-19. (22/03/2020)
5. Documento achegas Por Chantada comisión seguimento 24 de marzo de 2020 (24 de marzo de 2020)
6. Proposta de protocolo para a limpeza viaria no Concello de Chantada a aplicar durante a crise do COVID-19 (27/03/2020)
7.  “Estamos mellor no rural na crise do coronavirus?“, artigo en Nós Diario de Paula Verao (Agroma Sober) e Antom Fente (Por Chantada) sobre a crise e a situación no rural (30/03/2020).
8. Parte diario da situación sanitaria en Chantada a partir do 1 de abril de 2020 nas nosas RRSS e até que o Concello de Chantada dea conta da mesma nas canles oficiais, así como información variada de utilidade á cidadanía.
9. Comunicado de imprensa sobre a residencia de Chantada (02/04/2020, publicado o día 4).
10. Resumo das axudas supramunicipais ás que vos podedes acolller [COVID-19] (07/04/2020).
11. Proposta de protocolo para reparto de máscaras no Concello de Chantada a aplicar durante a crise do COVID-19 (18/04/2020).
12. Consideracións ante a emerxencia sanitaria e a crise social e económica pola COVID19 da plataforma Por un Interior Galego Vivo (IGV) (19/04/2020).
13. Decálogo de propostas urxentes perante a evolución da crise da COVID-19 e o novo cenario de confinamento. (22/04/2020).
14. Propostas derivadas da Comisión de seguimento da crise da COVID-19 do día 24 de abril. (25/04/2020)
15. FAQ #fase1: perguntas e respostas frecuentes sobre a Fase 1 do desconfinamento progresivo. (09/05/2020).
16. Por Chantada denuncia a privatización do SAF en plena pandemía (2/06/2020).
17. Solicitude de Por Chantada-CUP en relación co PACES (07/06/2020).

Estamos tamén en permanente contacto coas candidaturas e entidades da plataforma Por un Interior Galego Vivo para partillarmos propostas e informacións.

 

Consideramos tamén interesante a seguinte información, que sintetiza cuestións, do ámbito sanitario (consulta máis información básica para a cidadanía aquí: https://porchantada.wordpress.com/2020/04/11/blindar-o-rural-covid-19-recomendacions/):

 

 

 

 

 

 

Queremos, por último, reiterar os chamamentos á calma e a importancia de guiarnos por informacións contrastadas e facer caso das disposicións das autoridades sanitarias. Para calquera cuestión que nos queirades facer chegar podedes contactarnos ben através do formulario de contacto da nosa bitácora ou ben nas redes sociais.

 

#ficanacasa #apoiomutuo #solidariedade

A CUP denuncia a precariedade á que se somete a atención sanitaria en Chantada

 

Desde Por Chantada denunicamos que o PP segue coa súa política de agresión aos servizos públicos elementares en pleno mes de agosto, xusto cando máis poboación está no termo municipal de Chantada. Á cosabida polémica das ambulancias ou da pediatría, que está lonxe de solucionarse e semella vai cronificarse alén do verán deixando desamparadas as nosas crianzas, súmanse novas medidas que deixan á poboación en situación de vulnerabilidade e discriminada.

Comezada hoxe a segunda quincena de agosto no centro de saúde de Chantada hai un médico de ferias sen cobrir a baixa, unha médica xubilada amortizada, 2 enfermeiros de ferias sen substituír tampouco, o fisioterapeuta tamén de ferias sen recambio e o servizo de pediatria só vén desde Monforte dous días á semana vestindo un santo para desvestir outro. Esta situación vaise prolongar durante 15 días e ameaza con ser cada vez máis usual.

Os recortes no servizo contrasta con aumento do gasto para a xestión e para as contratas con empresas privadas. Así, un contrato millionario das ambulancias con Salutrans serviu no seu día para degradar e reducir o servizo de ambulancias existindo neste momento unha única ambulancia para toda a zona con isócronas superiores aos 50 minutos (atención por exemplo en Peares). Do mesmo xeito a falta de material ou a situación da pediatría contrata cos investimentos cada vez maiores que reciben empresas privadas que drenan o groso dos recursos do sistema sanitario. A receita do PP para a sanidade e a educación é clara: operar unha lucrativa privatización encoberta socializando as perdas e privatizando os beneficios.

Como denunciamos nas alegacións ao Anteproxecto para a reforma da lei 8/2008, de 10 de xullo, de saúde da Galiza o PP prometeu que esta ía ser “a lexislatura do rural” cando o que presenciamos é un abandono e ataque do tecido produtivo (sector primario) e a supresión ou degradación dos servizos públicos: pediatría, fisioterapía, PAC, etc.

Asemade, desde a CUP sinalamos igualmente o contraste entre as palabras e os feitos do Goberno municipal, que segue sen adoptar ningunha medida enérxica e explícita para a defensa do noso centro de saúde e da sanidade pública. Nesta tesitura de abandono e desprezo por parte das institucións, en Chantada só nos fica, en tanto en canto cidadáns, rachar coa submisión e o invisíbel veo do medo para autoorgarnizarnos, mobilizarnos e defender nas rúas os direitos de todas e todos.

#SomosAlternativa #CUPChantada

ALEGACIÓNS AO ANTEPROXECTO DE LEI POLO QUE SE MODIFICA A LEI 8/2008 DE SAÚDE DA GALIZA

 

No día da romaría do Faro desde Por Chantada-CUP apresentamos alegacións ao anteproxecto de lei polo que se mofifica a Lei 8/2008, do 10 de xullo, de saúde da Galiza. Preocúpanos que afonda na ofensiva de socializar as perdas e privatizar os beneficios, degradar a sanidade pública e incrementar a condición periférica de Chantada e da Ribeira Sacra ao tempo que acelera a merma dos servizos sanitarios, facendo desaparecer a área sanitaria de Lemos.

Máis información no pdf coas nosas alegacións: alegacións anteproxecto lei supresión área sanitaria Monforte 

Outra documentación de interese: SA_lei_modificacion_lei saude_galicia_gal

Animámosvos a apresentardes as vosas alegacións (podedes facer vosas as nosas suxestións ou moficalas) premendo aquí (abrirase unha nova páxina).

#SomosAlternativa #CUPChantada

[PLENOS] Crónica do pleno ordinario de xaneiro de 2017

O pleno ordinario de xaneiro comezou ás 20 horas, segundo o previsto, incorporándose o concelleiro Manuel Javier Goyanes (PP) no ponto 3. Non asistiu a interventora, supostamente por non existiren “asuntos económicos”, o cal non se axusta, como se verá, á realidade.

No tocante ao público, apenas entre 3 e 5 persoas, no entanto un dos mellores dados de asistencia da lexislatura por triste que sexa. Non houbo presenza da imprensa e só un grupo, Por Chantada-CUP levou propostas ao pleno (3 mocións). O grupo de Goberno non foi capaz de pór na orde do día un só asunto.

[Crónica] Pleno ordinario de xullo de 2016

 

 

O de xullo é o pleno ordinario no que o Goberno chega co chip das ferias, pois é o previo ás vacacións oficiais do alcalde e, habitualmente, ten escasa carga. Isto determinou tamén a súa brevidade. Comezando ás 20:04 horas e rematando sobre as 23:00 horas. O concelleiro do PP Manuel Javier Goyanes incorporouse co pleno xa comezado e o de INTA Diego Otero Veiga non asistiu ao encontrarse de vacacións en Sevilla, a pesar de comezar a traballar aínda o día 1 de xuño, o que xunto á negativa de Manuel Varela de facer públicas as súas funcións, amparándose na maioría absoluta con pouco máis do 40% dos votos, é unha evidente falta de respecto á cidadanía de Chantada e unha concepción da política a desterrar.

A continuación damos unha detallada crónica do mesmo.

MOCIÓN DE POR CHANTADA-CUP para a posta en marcha do Consello da Área de Monforte de Lemos

 

Confire aquí a moción íntegra en pdf.: MOCIÓN POR CHANTADA. Consellos de saúde

[Vídeos] Pleno ordinario 09/05/2016